కూతురు కప్ గెలిచి తండ్రి ఉద్యోగం నిలిపింది .. ఆ తండ్రికి ఇంతకన్నా గొప్ప పుత్రికోత్సాహం ఉంటుందా ?

ఆడపిల్ల అనగానే గుండెల మీద కుంపటిగా భావించే తల్లితండ్రులు ఉన్న ఈ రోజుల్లో ఆడపిల్లే ఇంటి మహాలక్ష్మి అవుతుందని రుజువు చేస్తున్న కూతుర్లు కూడా ఉన్నారు

కూతురు పుడితే తల్లితండ్రులకు శాపం అనుకునే పరిస్థితుల నుంచి కూతురు పుడితేనే వరం అనుకునే స్థాయికి వర్తమాన ఆడపిల్లలు రుజువు చేస్తున్నారు

కూతురు వల్ల తమకు గౌరవం దక్కితే ఆ తల్లితండ్రులకు అంతకన్నా గొప్ప విషయం ఏముంటుంది ?

ప్రపంచ కప్ గెలుచుకున్న భారత మహిళా జట్టులో ఒకరైన క్రాంతి గౌడ్ ఆ ఘనతను సాధించింది

మధ్యప్రదేశ్ లోని బాగా వెనుకబడిన బుందేల్ ఖండ్ ప్రాంతం ఛత్తర్పూర్ జిల్లాకు చెందిన మారుమూల గ్రామానికి చెందిన క్రాంతి గౌడ్ ది అతి సాధారణ కుటుంబ నేపధ్యం

చిన్నప్పుడు క్రాంతి క్రికెట్ ఆట మీద మక్కువ చూపిస్తే ఆడపిల్లవు మగరాయుడిలా క్రికెట్ ఆడటమేంటి ? అని గ్రామస్తులు ఎగతాళి చేసారు

తల్లితండ్రులు కూడా పిల్లని పెంచి పెళ్లి చేస్తే చాలనుకున్నారు
కూతురినించి అంతకంటే మరేమీ ఆశించలేదు

కానీ క్రాంతి లక్ష్యం వేరు
ఏనాటికైనా గొప్ప క్రికెటర్ కావాలనేది ఆమె ఆశయం

ఊరి కట్టుబాట్లు , గ్రామస్తుల ఎగతాళి , ఇవేమీ ఆమె లక్ష్యాన్ని ఆపలేకపోయాయి

వీధుల్లో ఆడటం మొదలుపెట్టిన క్రాంతి డీవై పాటిల్ స్టేడియంలో ప్రపంచ కప్ ఆడే స్థాయికి ఎదిగింది

కంటే కూతుర్నే కనాలి అని తల్లితండ్రులు గర్వపడే స్థాయికి చేరుకుంది

బుధవారం ప్రధానితో ముఖాముఖీ మాట్లాడింది
గురువారం రాష్ట్రపతి భవన్ లో సత్కారం పొందింది

ఈ దృశ్యాలను టీవీల్లో చూసిన తల్లితండ్రులు , గ్రామస్తుల ఆనందానికి అవధులు లేవు

ఢిల్లీ నుంచి స్వరాష్ట్రమైన మధ్యప్రదేశ్ చేరుకున్న క్రాంతి గౌడ్ కి అక్కడి ప్రభుత్వం అధికార లాంఛనాలతో స్వాగతం పలికింది

మధ్యప్రదేశ్ ముఖ్యమంత్రి డాక్టర్ మోహన్ యాదవ్ శుక్రవారం భోపాల్ లోని తన కార్యాలయంలో క్రాంతి గౌడ్ కి కోటి రూపాయల నగదు బహుమతి ప్రకటించి , ఆమె తల్లి నీలం , తండ్రి మున్నాసింగ్ గౌడ్ , కోచ్ రాజీవ్ లను కూడా ఘనంగా సత్కరించారు

ఈ సందర్భంగా క్రాంతి గౌడ్ ముఖ్యమంత్రిని ఒక కోరిక కోరింది

ఆమె తండ్రి మధ్యప్రదేశ్ పోలీస్ శాఖలో సాధారణ కానిస్టేబుల్
గతంలో ఒక కేసు విచారణలో భాగంగా ఉన్నతాధికారులు ఆయన్ని సస్పెండ్ చేసారు

ఆ కేసులో ఆయన ఎటువంటి తప్పు చేయలేదని , అందుకే తన తండ్రికి తిరిగి పోస్టింగ్ ఇప్పించాల్సిందిగా ఆమె సీఎం ను అభ్యర్ధించింది

ఆయనకు వెంటనే పోస్టింగ్ ఇవ్వాల్సిందిగా సీఎం అప్పటికప్పుడు ఉన్నతాధికారులను ఆదేశించారు

గమ్మతేమిటంటే సస్పెండ్ అయిన ఈ కానిస్టేబుల్ ను డిజిపి తో సహా పోలీస్ ఉన్నతాధికారులు సాదరంగా స్వాగతం పలికి సీఎం కార్యాలయంలోకి తీసుకెళ్లారు

అదీ కూతురి పవర్

పనిలో పనిగా బాగా వెనుకబడిన ప్రాంతమైన తమ ఛత్తర్పూర్ జిల్లాలో క్రికెట్ స్టేడియం నిర్మిస్తే భవిష్యత్తులో తనలాంటి మరింతమంది క్రీడాకారులకు ఉపయోగపడుతుంది అని ఆమె విజ్ఞాపన చేయడంతో సీఎం వెంటనే అంగీకరించాడు

అధికార లాంఛనాలతో గౌరవ మర్యాదలు పొందిన ఆ తండ్రి ఆనందానికి అయితే అవధులు లేవు

డిపార్ట్మెంట్లో ఎన్నో అవమానాలను ఎదుర్కున్న తనకు కూతురి వల్ల జీవితంలో పొందలేని గౌరవ మర్యాదలు దక్కాయని కన్నీటి పర్యంతం అవుతూ చెప్పాడు

ఈ వార్త చదివిన ఏ తల్లితండ్రులైనా ఇక ముందు కంటే కూతుర్నే కనాలి అని అనుకోక మానరు !

ఈ ఆర్టికల్ షేర్ చేయదల్చుకున్నవారు ఇక్కడ కనిపిస్తున్న వాట్సాప్ , ఫేస్ బుక్ ఐకాన్ల ద్వారా షేర్ చేయొచ్చు