తెలుగు లోగిళ్ళలో పండగలు పెళ్లిళ్లకు ఇతర శుభకార్యాలకు అచ్చ తెనుగు సంప్రదాయంలో ధోతీలు , పంచెలు , చీరలు కట్టుకునేవారి సంఖ్య పెరిగింది
సెలెబ్రిటీలు కూడా పెళ్లిళ్లలో సూటు బూటు వదిలేసి చక్కటి సాంప్రదాయ వస్త్ర ధారణలో మెరిసిపోతున్నారు
ప్రస్తుత స్పీడ్ యుగంలో ఈ సంప్రదాయానికి శ్రీకారం చుట్టింది కె ఆర్ నాగరాజన్
నాగరాజన్ అంటే చాలామందికి తెలీదు
రామరాజు కాటన్స్ నాగరాజు అంటే అందరికీ తెలుసు
ఎస్ .. ఈ రోజు దాదాపు ప్రతి పండగలో , పెళ్లిళ్లలో రామరాజు వస్త్రాలు తళుక్కున మెరుస్తాయి
ఆ వస్త్రాలు చూడటానికి హాయిగా ఉండటమే కాకుండా చక్కటి నిండుదనం ఉట్టిపడుతుంది
ఈ రోజు రామరాజు బ్రాండ్ కాటన్ టెక్సటైల్స్ బ్రాండ్ గా ప్రసిద్ధి చెందటం వెనుక నాగరాజన్ కష్టం ఉంది
1983 లో తమిళనాడులో చిన్న టెక్సటైల్స్ పరిశ్రమగా ప్రారంభం అయిన రామరాజు కాటన్స్ ఇవాళ దేశ విదేశాల్లో అమ్మకాలు జరుపుకుంటూ 2,500 కోట్లకుపైగా బిజినెస్ చేస్తుంది
మొదట్లో నాగరాజన్ గారు ధోతీ పంచెల వ్యాపారం మొదలుపెడుతున్నాడని తెలిసి బంధువులు కూడా అతన్ని ఎగతాళి చేశారట
ఈ ఆధునిక యుగంలో అందరూ అప్డేట్ అయి సూటుబూటులు వేసుకుంటుంటే ఇంకా ఆ పాతకాలపు సాంప్రదాయ వస్త్రాలు ఎవరు వేసుకుంటారు అని గేలి చేసారు
దానికి తోడు ఒకసారి నాగరాజన్ సాంప్రదాయ వస్త్రాల్లో ఒక పేరున్న హోటల్లోకి వెళ్లబోతుండగా ధోతీ ధరించాడన్న కారణంతో అతన్ని లోనికి పంపడానికి నిరాకరించారు
సాంప్రదాయ దుస్తులను తక్కువ చేసి చూడటంతో ఆనాడే నాగరాజన్ మళ్ళీ ఆ వస్త్రాలకు పూర్వ వైభవం తీసుకురావాలని నిర్ణయించుకున్నారు
దానితో నాగరాజన్ నిరుత్సాహపడకుండా తనతండ్రి పేరు రామస్వామిలో రామ , తనపేరు నాగరాజన్ లో రాజు కలిపి రామరాజ్ కాటన్స్ పేరిట వ్యాపారం ప్రారంభించాడు
ఇంటర్ స్థాయిలోనే చదువులో ఫెయిల్ అయిన నాగరాజన్ కేవలం 83 వేలతో వ్యాపారం మొదలుపెట్టి నేడు ఒక్క ధోతీలమీదే 2,500 కోట్ల టర్నోవరు సాధించాడు
చిన్నగా మొదలైన రామరాజ్ వ్యాపారంలో నాగరాజన్ క్వాలిటీకి మొదటి ప్రాధాన్యత ఇచ్చేవాడు
ఇప్పట్లా అప్పట్లో డిజిటల్ మార్కెటింగ్ చేసుకునే అవకాశాలు లేవు
అంతా మౌత్ పబ్లిసిటీ మీదే నడిచేది
రామరాజ్ క్వాలిటీ ఆనోటా ఈనోటా పాకి రామరాజ్ కాటన్స్ బ్రాండ్ గా మారి అమ్మకాలు పెరిగాయి
గతంలో ఎవరైతే ఈయనను ఎగతాళి చేసారో వాళ్ళే పెళ్లిళ్లలో రామరాజ్ కాటన్స్ ధరించి ఫోటోలు దిగారు
ప్రస్తుతం 500 పైగా స్టోర్లతో రామరాజ్ దూసుకుపోతుంది
ఆ మధ్య తమిళనాడులో చైనా అధ్యక్షుడి పర్యటనలో భారత ప్రధాని నరేంద్ర మోడీ రామరాజ్ బ్రాండ్ ధోతీ ధరించడంతో ఆ బ్రాండ్ ఇమేజ్ అమాంతం పెరిగింది
ఒక్కడుగా ప్రారంభించిన రామరాజ్ కాటన్స్ ప్రస్తుతం 90 వేలమందికిపైగా చేనేత కార్మికులకు ప్రత్యక్ష పరోక్ష ఉపాధి కల్పిస్తుంది
సనాతన సాంప్రదాయ వస్త్రాలకు బ్రాండ్ ఇమేజ్ తీసుకువచ్చి విజయం సాధించిన రామరాజ్ కఠోర శ్రమ , పట్టుదల , అంకిత భావం ఎందరో ఔత్సాహిక వ్యాపారస్తులకు స్ఫూర్తి !
పరేష్ తుర్లపాటి
