1980 వ దశకంలో మొబైల్ ఫోన్లు , ఇంటర్నెట్ ఇంకా రంగ ప్రవేశం చేయని రోజుల్లో విజయవాడలో మాత్రం క్షణాల్లో వార్త ఊరంతా పాకేది
అలా ఓ రోజు సాయంత్రం విజయవాడలో ఓ వార్త క్షణాల్లో ఊరంతా దావాలనంలా వ్యాపించింది
ఆ వార్తే వంగవీటిని సస్పెండ్ చేసిన జలగం
విషయం తెలియగానే స్థానిక నాయకులు, విద్యార్థులు , కార్మికులు , అభిమానులు ఇలా ఒకరనేమిటి వందలాది అడుగులు గవర్నర్ పేటలోని రంగా డాబా వైపు పరుగులు పెట్టాయి
అప్పట్లో వంగవీటి నివాసాన్ని డాబా అని పిలుచుకునేవాళ్ళు
పేరుకే డాబా అని పిలుస్తారు కానీ ఇప్పటి ఎమ్మెల్యేల మాదిరి ఫైవ్ స్టార్ హోటళ్లను తలదన్నేలా ఉండక ఎటువంటి హంగులు లేకుండా సామాన్య మధ్య తరగతి వారి ఇల్లులా ఉంటుంది
గవర్నర్ పేట రాఘవయ్య పార్క్ ఎదురుగా సన్నటి సందులో కార్నర్ ఇంట్లో వంగవీటి పై పోర్షన్లో ఉండేవారు
పై పోర్షన్లో కూడా చిన్న హాలు , ఆయన కూర్చోవడానికి ఓ చెక్క కుర్చీ , చెక్క బల్ల , నాలుగు ఇనప ఫోల్డింగ్ కుర్చీలు ఉండేవి
అంతకుమించి పెద్ద ఫర్నిచర్ కూడా ఏమీ ఉండేది కాదు
కాంగ్రెస్ పార్టీనుంచి వంగవీటి మోహన రంగాను సస్పెండ్ చేస్తూ జలగం వెంగళరావు నిర్ణయం తీసుకున్నారనే వార్త తెలిసి విషయమేంటో కనుక్కుందామని కొంతమంది మీడియా మిత్రులతో కలిసి నేను కూడా ఆయన ఇంటికి వెళ్ళాను
అప్పటికే అక్కడికి విజయవాడ నలుమూలనుంచి వచ్చిన అభిమానులు పోటెత్తారు
పొరుగు జిల్లాలనుంచి అభిమానులు లారీల్లో విజయవాడ బయలుదేరారని తెలిసింది
నేను వెళ్లేసరికి అక్కడి అభిమానులతో ” మనకు మళ్లీ ప్రమోషన్ వచ్చింది..” అని నవ్వుతూ చెప్తున్నారు వంగవీటి మోహన రంగా
(ఎటువంటి విపత్కర పరిస్థితుల్లో కూడా కూల్ గా నవ్వుతూ పలకరించడం వంగవీటి లో నాకు నచ్చిన గుణం..ఆ గుణమే వంగవీటిని జననేతను చేసింది)
ఇంకొకళ్లయితే తమ సస్పెన్షన్ వ్యవహారంపై మీడియాలో ఆవేశపడిపోవటమో..బూతులు తిట్టటమో చేస్తారు
కానీ వంగవీటి స్టయిలే వేరు
ప్రతికూల పరిస్థితుల్లో కూడా కూల్ గా ఉంటారు !
సస్పెన్షన్ వ్యవహారాన్ని తన రాజకీయ ఎదుగుదలకు ఒక అవకాశంగా భావించుకున్నారు..అలాగే మలుచుకున్నారు కూడా !
మరోపక్క అప్పటికే ఆయన అభిమానులు ఆవేశంతో ధర్నాలు చేయడానికి సిద్దపడుతున్నారు
కానీ వంగవీటి మాత్రం తనను పార్టీ నుంచి సస్పెండ్ చేయడం పెద్ద విషయం కానట్టు కూల్ గా నవ్వుతూ పిల్లలను తీసుకుని బీసెంట్ రోడ్ బయలుదేరారు !
ఇంటికి వచ్చిన జనం కూడా ఆయన్ను అనుసరించటం మొదలుపెట్టారు
షుమారు యాభయ్ మందితో ఇంటినుంచి బయలుదేరిన రంగా రోడ్డు మీదకు వచ్చేసరికి వెనుక వందలమంది యాడ్ అయ్యారు
అడుగు అడుగుకి వెనుక జనం పెరుగుతున్నారు
ముందు వంగవీటి
వెనుక జనం
ఇది కాకుండా విజయవాడకు లారీల్లో బయలుదేరిన జనం
(అప్పట్లో మొబైల్ ఫోన్లు లేవు..అయినా సరే వంగవీటి సమాచారం నిమిషాల్లో జిల్లాలకు చేరిపోయేది )
రంగా మాత్రం తాపీగా నడుచుకుంటూ బీసెంట్ రోడ్ లో రవి ఫ్యాన్సీ అనే షాప్ లో పిల్లలకు కావాల్సిన షాపింగ్ చేశారు !
ఓనర్ డబ్బులు వద్దన్నా బలవంతంగా అతడి చేతిలో డబ్బులు పెట్టి తిరిగి ఇంటికి నడుచుకుంటూ బయలుదేరారు
అప్పటికే ఇంటిదగ్గర చుట్టుపక్కల నుంచి వచ్చిన జనాలతో కిటకిటలాడిపోతుంది
తర్వాత ప్రజా ఆగ్రహాన్ని చూసిన కాంగ్రెస్ నాయకత్వం రంగా పై సస్పెన్షన్ ఉపసంహరించుకుంది
దాంతో కాంగ్రెస్ పార్టీలో వంగవీటి మోహన రంగా మరింత బలమైన నాయకుడిగా ఎదిగారు
అసలు వంగవీటి మోహన రంగా ను కాంగ్రెస్ పార్టీ నుంచి జలగం వెంగళ రావు సస్పెండ్ చెయ్యటం వెనుక చిన్న నేపథ్యం ఉంది !
ఒకానొక రోజుల్లో దేశమంతా కాంగ్రెస్ ప్రభంజనం నడుస్తున్న టైములో విజయవాడలో మాత్రం కమ్యూనిస్టుల హవా నడిచేది
కాంగ్రెస్ పార్టీ కూడా విజయవాడలో కమ్యూనిస్టులను ధీటుగా ఎదుర్కోగల నాయకుడి కోసం ఎదురుచూస్తున్న రోజులు
సరిగ్గా ఆ టైంలో వారి దృష్టిని ఒక యువకుడు ఆకర్శించాడు !
అతడికి ఏ పార్టీ జెండా లేదు
ప్రచారానికి గడప గడప తొక్కింది లేదు
మొక్కింది లేదు
అసలు ప్రచారానికి వెళ్లే అవకాశం కూడా లేదు !
ఆ యువకుడు విజయవాడ మున్సిపల్ ఎన్నికల్లో ఇండిపెండెంట్ గా జైలునుంచి పోటీ చేసి గెలిచిన వంగవీటి మోహన రంగా
దానితో కాంగ్రెస్ పార్టీ కన్ను వంగవీటిపై పడింది
విజయవాడ రాజకీయాలను మలుపు తిప్పగల చరిష్మా ఈ యువకుడిలో ఉందని గుర్తించింది
అప్పటికే విజయవాడలో బడుగు బలహీన వర్గాల్లో బలమైన నాయకుడిగా వంగవీటి ఎదుగుతున్నారు
అంతే కాంగ్రెస్ అధినాయకత్వం వంగవీటిని అక్కున చేర్చుకుంది
కేంద్రమంత్రి పి శివశంకర్ చొరవతో శాసనసభ ఎన్నికల్లో వంగవీటి మోహన రంగాకు విజయవాడ తూర్పు నియోజకవర్గం నుంచి పోటీ చేసేందుకు కాంగ్రెస్ పార్టీ టికెట్ ఇచ్చింది
మరోపక్క అప్పుడే ఎన్టీఆర్ స్థాపించిన తెలుగు దేశం పార్టీ వేవ్ ఆంధ్రప్రదేశ్ మొత్తం విపరీతంగా వీస్తున్న రోజులు
అలాంటి పరిస్థితుల్లో విజయవాడలో తమ స్థానం ఎలాగైనా నిలుపుకోవాలనే పట్టుదలతో కాంగ్రెస్ పార్టీ వంగవీటి మోహన రంగా ను బరిలో నిలిపింది
కాంగ్రెస్ పార్టీ నమ్మకాన్ని వంగవీటి వమ్ము చేయలేదు
ఎన్టీఆర్ ప్రభంజనంలో కూడా 1985 లో విజయవాడ తూర్పు నియోజకవర్గ శాసనసభ్యుడిగా ఎన్నికయ్యారు !
మెల్లిగా కాంగ్రెస్ పార్టీలో వంగవీటి సెంటర్ ఆఫ్ అట్రాక్షన్ గా ఎదిగారు
ఇది సహజంగా కాంగ్రెస్ పార్టీలో కొంతమంది సీనియర్ నాయకులకు నచ్చలేదు
పార్టీలో ఎప్పటినుంచో కొనసాగుతున్న తమ సీనియారిటీని కొత్తగా పార్టీలోకి వచ్చిన ఒక యువకుడు శాసించే పరిస్థితిని తట్టుకోలేకపోయారు
విషయం జలగం వెంగళ రావు కి చాడీలు చెప్పటం దాకా పోయింది
కాంగ్రెస్ పార్టీ విద్యార్థి అనుబంధ సంస్థ NSUI ఉండగా దాన్ని పక్కనబెట్టి రంగా సొంతంగా UI అనే విద్యార్థి సంస్థను నడుపుకుంటున్నారనేది ప్రధాన ఆరోపణ
UI ని రద్దు చెయ్యాలని కాంగ్రెస్ పెద్దలు హుకుం జారీ చేశారు
UI అనేది తన శరీరంలో ఒక భాగం కాబట్టి
కుదరదన్నారు రంగా
ఫలితంగా కాంగ్రెస్ పార్టీ నుంచి రంగాను సస్పెండ్ చేస్తూ జలగం వెంగళ రావు నిర్ణయం తీసుకున్నారు
తర్వాత సస్పెన్షన్ ఉపసంహరించుకోవటం వంగవీటి మోహన రంగా అదే కాంగ్రెస్ పార్టీలో బలమైన నాయకుడిగా ఎదగడం చక చకా జరిగిపోయాయ్
విజయవాడలో వంగవీటి మోహన రంగా వల్లనే కాంగ్రెస్ పార్టీ బలపడిందని అప్పట్లోనే చెప్పుకునేవాళ్ళు
ఇదీ ఆ వార్తకు నేపథ్యం !!
