1970 – 80 వ దశకంలో కుర్రకారును డిటెక్టివ్ సాహిత్యం ఒక ఊపు ఊపింది
అప్పట్లో మధుబాబు , కొమ్మూరి సాంబశివరావు , గిరిజశ్రీ భగవాన్ తదితరుల డిటెక్టివ్ నవలలు మార్కెట్లోకి వచ్చినరోజునే హాట్ కేకుల్లా అమ్ముడుపోయేవి
స్పై థ్రిల్లర్ కధాంశం కావడం పాఠకుల్లో ఆసక్తిని రేకెత్తించేది
బాలీవుడ్ జేమ్స్ బాండ్ స్పై థ్రిల్లర్ ఆపరేషన్స్ సినిమాలు ఇండియాలో కూడా ఆదరణ పొందాయి
ప్రేక్షకుల ఆదరణ గమనించిన సూపర్ స్టార్ కృష్ణ కూడా తెలుగులో ఏజెంట్ 116 పేరుతొ స్పై థ్రిల్లర్ మూవీకి శ్రీకారం చుట్టాడు
నవలలు కానివ్వండి , సినిమాలు కానివ్వండి డిటెక్టివ్ కధాంశాలకు అదొక యుగంలా నడిచింది
ముఖ్యంగా మధుబాబు రాసిన షాడో డిటెక్టివ్ నవలలు తెలుగు పాఠకులకు ఇప్పటికీ గుర్తుండిపోతాయి
ఇంటర్నెట్ లేని ఆ రోజుల్లోనే షాడో చేత అమెరికా , చైనా , సోవియట్ , జపాన్ , థాయిలాండ్ లలో
స్పై థ్రిల్లర్ ఆపరేషన్లు చేయించి లక్షలాది పాఠకుల అభిమానం పొందారు మధుబాబు
కాలక్రమంలో డిటెక్టివ్ సాహిత్య నవలలు , సినిమాలు మరుగున పడిపోయాయి
అయితే పాఠకుల.. ప్రేక్షకుల మదిలో మాత్రం శాశ్వతంగా ఉండిపోయాయి
చాలాకాలం తర్వాత 2019 స్పై థ్రిల్లర్ కధాంశంతో వచ్చిన ఫ్యామిలీ మ్యాన్ వెబ్ సిరీస్ సంచలనం సృష్టించింది
దీనికి వెబ్ సిరీస్ నిర్మాతలు సైతం ఊహించని స్పందన రావడంతో 2021 లో ఫ్యామిలీ మ్యాన్ సీజన్ 2 రిలీజ్ చేసారు
ఆశించిన విధంగానే సీజన్ 2 కి కూడా స్పందన బాగానే వచ్చింది
రెండు సీజన్లు పాజిటివ్ టాక్ తెచ్చుకోవడానికి ప్రధాన కారణం మనోజ్ బాజ్ పాయి
డిటెక్టివ్ ఆపరేషన్లు చేయడం తనకు కొట్టిన పిండి అన్నట్టు చేసాడు
నిజానికి ఈ సిరీస్ కి ఏజెంట్ శ్రీకాంత్ తివారి అని పేరు పెట్టాలి
కానీ యాక్షన్ సన్నివేశాలతో పాటు సెంటిమెంట్ , ఫ్యామిలీ భావోద్వేగాలు లాంటి ఎమోషన్లు పండించటానికి ఫ్యామిలీ మ్యాన్ అని పేరు పెట్టినట్టున్నారు
అతడు యెంత పెద్ద డిటెక్టివ్ అయినా ఇంట్లో మాత్రం మంచి భర్త , మంచి తండ్రిగా ప్రూవ్ చేసుకోవాలని తంటాలు పడుతూ ఉంటాడు
కానీ వృత్తిపరమైన వత్తిళ్ళ ఫ్యామిలీకి పూర్తిగా సమయం కేటాయించలేకపోతాడు
ఒకపక్క ఫ్యామిలీ ఎమోషన్లు చూపిస్తూనే , మరోపక్క సీక్రెట్ ఏజెంట్ గా స్పై థ్రిల్లర్ అడ్వెంచర్స్ చేస్తుండటంతో రెండు సీజన్లలో గ్రిప్ వచ్చింది
అందుకే సీజన్ 2 తర్వాత వెంటనే మూడో సిరీస్ కోసం కూడా ప్రేక్షకులు ఎదురుచూసినప్పటికీ నిర్వాహకుల నుంచి చాలాకాలం వరకు ఎటువంటి ప్రకటనలు రాలేదు
అదిగో ఆలా ఎదురుచూస్తున్న ప్రేక్షకుల కోసం ఫ్యామిలీ మ్యాన్ సీజన్ 3 ప్రకటన వచ్చింది
ప్రకటన రావడమే కాదు నవంబర్ 21 న అమెజాన్ ప్రైమ్ లో స్ట్రీమింగ్ కూడా చేసింది
మొదటి రెండు సీజన్లు క్లిక్ అవ్వడంతో సీజన్ 3 మీద కూడా భారీ అంచనాలు ఏర్పడ్డాయి
అయితే సీజన్ 3 కూడా గత సీజన్ల మాదిరి మెప్పించిందా ?
గత సీజన్లతో పోలిస్తే మూడో భాగంలో కధాంశాన్ని ఏ విధంగా ఎంపిక చేసుకున్నారు ?
టోటల్ గా సీజన్ 3 ఎలా ఉంది ? లాంటి ప్రశ్నలకు సమాధానాలు తెలుసుకుందాం !
ఫ్యామిలీ మ్యాన్ సీజన్ 3 కధేంటి ?
భారత్ లోని ఈశాన్య రాష్ట్రాల్లో అలజడులు సృష్టించాలని ప్రాజెక్టు గువాన్ యు పేరుతొ చైనా కుట్రలు చేస్తూ ఉంటుంది
ఈ ఆపరేషన్ లో భాగంగా చైనా కొంతమంది విద్రోహ టీమ్ ను తయారుచేసి వారిని ఈశాన్య రాష్ట్రాల్లో అలజడులు సృష్టించడానికి నియమిస్తుంది
ఈ విషయం తెలుసుకున్న ప్రధాని బసు (సీమా బిశ్వాస్ ) ఈశాన్య రాష్ట్రాల్లో శాంతిని నెలకొల్పి అక్కడ అభివృద్ధి పనులు చేయడానికి ‘ఆపరేషన్ సహకార్’ పేరుతొ ప్రాజెక్టుని ముందుకు తీసుకువస్తాడు
ఈ ప్రాజెక్టులో భాగంగా ఇంటలిజెన్స్ అధికారి కులకర్ణి , శ్రీకాంత్ లను నాగాలాండ్ వెళ్లి ఆందోళనకారులతో శాంతి చర్చలు చేపట్టమని టాస్క్ ఇస్తారు
ఆ టాస్క్ కోసం నాగాలాండ్ బయలుదేరిన కులకర్ణి , శ్రీకాంత్ లపై చైనా నియమించిన రుక్మాంగధ (జైదీప్ ఆహ్లావత్ ) గ్యాంగ్ దాడి చేసి కులకర్ణిని మట్టుపెడతారు
ఈ దాడిలో శ్రీకాంత్ తివారి ( మనోజ్ బాజ్ పాయ్ ) గాయాలతో తప్పించుకుని బయటపడతాడు
ఇదిలా ఉండగా కులకర్ణిని శ్రీకాంతే హత్య చేసి ఉంటాడని ఏజెన్సీలు వెంటబడతాయి
ఈ పరిస్థితుల్లో శ్రీకాంత్ ఏం చేస్తాడు ?
కులకర్ణిని తాను హత్య చేయలేదని ఎలా నిరూపించుకుంటాడు ?
నాగాలాండ్ లో హింసకు పాల్పడుతున్న రుక్మా గ్యాంగ్ ను ఎలా ఎదుర్కొంటాడు ? అనేది మిగిలిన ఎపిసోడ్స్ లో తెలుస్తుంది
సీజన్ 3 లో మొత్తం ఆరు గంటల నిడివితో 7 ఎపిసోడ్స్ ఉంటాయి
ఎలా ఉందంటే ?
ఇప్పటికే రెండు సీజన్లతో క్రేజ్ రావడంతో సీజన్ 3 మీద కూడా భారీగానే అంచనాలు ఏర్పడ్డాయి
ఆ అంచనాలతోనే సీజన్ 3 చూస్తే మాత్రం కొంత నిరాశ కలిగించకమానదు
మొదటి రెండు సీజన్లలో కధానాయకుడు శక్తివంతంగా ఉంటాడు
శ్రీకాంత్ తివారి దేశంలో అత్యున్నత ఇంటలిజెన్స్ విభాగంలో సీక్రెట్ ఏజెంట్ రూపంలో ఉంటూ స్పై ఆపరేషన్లు నిర్వహించాడు కాబట్టి ప్రేక్షకుల్లో పాత్ర పట్ల భారీ అంచనాలు ఏర్పడిపోయాయి
పాత్రకు తగ్గట్టుగా మనోజ్ బాజ్ పాయ్ నటన ఉండటంతో రెండు సీజన్లు హిట్ అయ్యాయి
అయితే శక్తివంతమైన కధానాయకుడి పాత్ర పోషించాల్సిన శ్రీకాంత్ అనుకోకుండా మాములు నిందితుడిలా పోలీసుల నుంచి తప్పించుకు తిరగడం ప్రేక్షకులకు అంతగా రుచించలేదు
ఈ సిరీస్ మొదటి ఎపిసోడ్స్ లో శ్రీకాంత్ తివారీని పట్టుకోవడం కోసం ఏజెన్సీలు వెతకడం , వారికి దొరక్కుండా శ్రీకాంత్ తప్పించుకు తిరగడంతో గత రెండు సీజన్లకు భిన్నంగా కొత్త ప్లాట్ తీసుకోవడంతో క్యారక్టర్ కి ఉన్న గంభీరత పోయింది
ఎపిసోడ్స్ లో రుక్మా వ్యక్తిగత జీవితం గురించి , శ్రీకాంత్ ఫ్యామిలీ సన్నివేశాలకు ఎక్కువ సమయం కేటాయించడంతో కధనాన్ని కొంత సాగదీసినట్టు అనిపించింది
శ్రీకాంత్ కు సాయంగా జేకే తల్పడే రావడంతో ఎపిసోడ్ తిరిగి గాడిన పడుతుంది
విజయ్ సేతుపతి ని ఇందులోకి తీసుకురావడంతో కొంత హైప్ వచ్చింది
ఈశాన్య రాష్ట్రాల్లో చైనా అలజడులు సృష్టించాలని కుట్రలు చేయడం , దానికి కౌంటర్ గా ఇండియన్ సీక్రెట్ ఏజెంట్ శ్రీకాంత్ తివారీ , కులకర్ణి తో కలిసి ఆపరేషన్ సహకార్ లో భాగంగా నాగాలాండ్ బయలుదేరటం వరకు బానే ఉంది
అదే టెంపోని కంటిన్యూ చేస్తూ ఇద్దరు ఆఫీసర్లు రుక్మా ని పట్టుకుని టాస్క్ కంప్లీట్ చేసి ఉంటె గత సీజన్ల మాదిరే థ్రిల్లింగ్ ఉండేదేమో ?
కానీ ఆపరేషన్ చెయ్యాల్సిన ఏజెంట్ పోలీసుల దృష్టిలో మోస్ట్ వాంటెడ్ క్రిమినల్ కావడంతో కథ కొద్దిగా సైడ్ ట్రాక్ లోకి వెళ్లిందనిపిస్తుంది
ఎవరెలా చేసారంటే ?
ఫ్యామిలీ మ్యాన్ సిరీస్ హిట్ అయ్యిందంటే అందుకు వన్ అండ్ వన్ ఓన్లీ మనోజ్ బాజ్ పాయే
అతను మొదటి సీజన్లోనే అత్యుత్తమ నటన ప్రదర్శించడంతో ఫ్యామిలీ మ్యాన్ మిగిలిన రెండు సీజన్లకు దూసుకెళ్లింది
ఒక స్పై ఏజెంట్ కు ఉండాల్సిన ముఖంలోనే ఏదైనా పలికించగల హావభావాలు , గంభీరత , వంటి లక్షణాలు మనోజ్ బాజ్ పాయ్ సొంతం
కాకపోతే గత రెండు సీజన్లతో పోలిస్తే సీజన్ 3 లో అతడి పాత్ర అంత శక్తివంతంగా ఏమీ అనిపించదు
శ్రీకాంత్ భార్య పాత్రలో ప్రియమణి మొదటి రెండు సీజన్ల మాదిరిగానే మెప్పించింది
పిల్లల పాత్రలో వేదాంత్ సిన్హా . ఆశ్లేష ఠాగూర్ లు బాగానే చేసారు
ఇక ఈ సిరీస్ లో శ్రీకాంత్ సహా ఉద్యోగిగా వచ్చిన తల్పడే పాత్రలో షరీబ్ హష్మీ రాకతో మంచి వినోదం వచ్చింది . కధనంలో కొంత హుషారు కూడా వస్తుంది
సందీప్ కిషన్ , విజయ్ సేతుపతిల రాక అదనపు ఆకర్షణ ఇచ్చింది
సాంకేతికంగా గత రెండు సిరీస్ లా మాదిరే మూడో సిరీస్ కూడా బావుంది
మొదటి రెండు సీజన్లతో కంపేర్ చేసుకుంటే ఇందులో యాక్షన్ పోర్షన్ తగ్గించి ఫ్యామిలీ డ్రామా , ఎంటర్టైన్మెంట్ కు ఎక్కువ స్పేస్ ఇచ్చారు
గత రెండు సిరీస్లతో పోలిస్తే ఈ సిరీస్ లో కొన్ని ఎపిసోడ్స్ లో కొంత గ్రిప్పింగ్ తగ్గినట్టు అనిపించినా మొత్తంగా సిరీస్ బానే ఉంది
నటీనటులు : మనోజ్ బాజ్ పాయి , ప్రియమణి , షరీబ్ హష్మీ , జైదీప్ ఆహ్లావత్ , తదితరులు
నిర్మాణ సారధ్యం : రాజ్ అండ్ డీకే
దర్శకత్వం : రాజ్ అండ్ డీకే , సుమన్ కుమార్ , తుషార్
స్ట్రీమింగ్ : అమెజాన్ ప్రైమ్
