ఆధ్యాత్మిక అంశాల్లో ప్రతి ఒక్క ప్రశ్నకు సరైన సమాధానం కూడా ఉంటుంది
ఆ సమాధానం ఆధారంగానే భక్తుల నమ్మకాలూ ఉంటాయి
ప్రతి నమ్మకం వెనుక ఒక బలమైన కారణం కూడా ఉంటుంది
అలాంటి ఒక నమ్మకమే శివాలయాల్లో మనసులోని కోరికలను ముందుగా నంది చెవిలో చెప్పడం
శివ పురాణాల్లో నందికి విశేషమైన ప్రాముఖ్యత ఉంటుంది
అందుకే నంది లేని శివాలయం ఉండదు
అందరూ కాకపోయినా చాలామంది భక్తులు శివాలయాల్లో నంది చెవిలో తమ కోరికలను చెప్పుకోవడం మీరు చూసే ఉంటారు
మనసులోని కోరికలను నేరుగా శివుడికే చెప్పుకోవచ్చు కదా ?
ముందుగా నంది చెవిలో చెప్పడం వెనుక అసలు విషయం ఏంటి ?
అలా భక్తులు చెప్పుకోవడం వెనుక పురాణాల్లో ఓ ప్రసక్తి ఉంది
నంది కేవలం శివుని వాహనమే కాదు .. స్వామికి అత్యంత విశ్వాసుడు , పరమ భక్తుడు కూడా
శివుడు తపస్సులోకి వెళ్లి ధ్యానం చేసుకుంటున్నప్పుడు ఆయనకు తపో భంగం కాకుండా నంది అత్యంత భక్తిశ్రద్దలతో వాకిలి వద్ద కావలి కాసేవాడు
నంది భక్తికి మెచ్చిన శివుడు ఓ వరం ఇచ్చాడట
తాను తపస్సులో ఉన్నప్పుడు భక్తుల కోరికలను ముందుగా నంది చెవిలో చెబుతారని , తద్వారా తర్వాత అవి నంది ద్వారా తనకు చేరేలా వరం ఇచ్చాడట
అందుకే భక్తులు తమకు శివుడికి మధ్య నంది వారధిలా పనిచేస్తుందని నమ్ముతారు
తమ మనసులోని కోరికలను నంది చెవిలో మెల్లిగా చెబితే అవి సాక్షాత్తు పరమ శివుడికి చేరతాయని భక్తుల విశ్వాసం!
