బీజేపీ గెలుపుకి ‘నమో’ నామం తారక మంత్రంలా పనిచేస్తుందా ?

ఒకే మనిషి సుదీర్ఘ కాలం అటు పార్టీలోనూ , ఇటు దేశంలోనూ చక్రం తిప్పడం వెనుక విజయ రహస్యం ఏంటి ?

అసలు మోడీ మ్యాజిక్ ఏంటి ?

భారత దేశం వంటి అతి పెద్ద ప్రజాస్వామిక దేశానికి ఒకే మనిషి సుదీర్ఘ కాలం నాయకత్వం వహించి పరిపాలించడం అంటే మాములు విషయం కాదు

రాజుల కాలంలోనూ , నియంతల కాలంలోనూ వంశపారం పర్యంగా ఒకే కుటుంబం , లేదా ఒకే వ్యక్తి సుదీర్ఘ కాలం పాలించిన రాజులను , నేతలను చూసాం
నియంతృత్వంలో ప్రజాస్వామ్యానికి అవకాశం లేదు కాబట్టి అక్కడ వారిదే రాజ్యం

కానీ ప్రజాస్వామ్యంలో అలా ఉండదు

పాలనకు అవకాశం ప్రజల ద్వారా మాత్రమే వస్తుంది
అంటే ప్రజల విశ్వాసాలను , నమ్మకాలను నిలబెట్టగలిగితేనే అధికారంలో ఉండే అవకాశం ఉంటుంది

ప్రజల విశ్వాసాన్ని కోల్పోయిన మరుక్షణాన ఓటు పోటును ఎదుర్కుని అధికారం కోల్పోవాల్సి ఉంటుంది

ప్రజాస్వామ్య ఆటుపోటులను తట్టుకుని గతంలో ఇందిరా గాంధీ , ప్రస్తుతం నరేంద్ర మోడీ భారత దేశాన్ని సుదీర్ఘ కాలం పరిపాలించగలిగారు

సరే గాంధీలది కుటుంబ పార్టీ కాబట్టి , ఇందిరా గాంధీ ఆ పార్టీకి జీవిత కాల అధ్యక్షురాలు కాబట్టి ఆవిడ సుదీర్ఘ కాలం పరిపాలించింది అనుకోవచ్చు ( అఫ్కోర్స్ ఎన్నికల తంతును అనుసరించే అనుకోండి )

మోడీ గతం

కానీ నరేంద్ర మోడీ పరిస్థితి అలా కాదు
జాతీయ పార్టీలో నేరుగా పదవులు రాలేదు

ఎక్కడో మారుమూల గ్రామం నుంచి ఆరెస్సెస్ నాయకుల సిఫార్సుతో బీజేపీ సభ్యత్వం పొందగలిగాడు

అప్పటికి మోడీ గుజరాత్ లోని అహ్మద్ నగర్ , వాద్ ప్రాంతాలలో ఆరెస్సెస్ ప్రచారక్ గా మాత్రమే స్థానికులకు తెలుసు

మోడీది రాజకీయ నేపథ్యం ఉన్న కుటుంబం కూడా కాదు
ఆయన తండ్రికి వాద్ నగర్ రైల్వే స్టేషన్లో క్యాంటీన్ ఉండేది

మోడీ అప్పుడప్పుడు క్యాంటీన్ కు వెళ్లి తండ్రికి సాయం చేస్తూ ఉండేవాడు

చదువుల్లో కూడా పెద్దగా ట్రాక్ రికార్డ్ ఏమీ లేదు
సాధారణ విధ్యార్ధిగానే ఉండేవాడు

కాకపోతే స్కూల్ లో చదువుకునే రోజుల్లోనే మోడీ వేదికల మీద నాటకాలు వేసి బహుమతులు గెల్చుకున్నాడని అంటారు

ఆయన డిగ్రీ పట్టా కూడా డిస్టెన్స్ ఎడ్యుకేషన్ లో పొందాడని అంటారు
సరే , చదువుకి , నాయకత్వ సామర్ధ్యానికి సంబంధం లేదనుకోండి

ఇలాంటి సాధారణ నేపధ్యం ఉన్న మోడీని సమర్ధవంతమైన నాయకుడిగా తయారు చేసిన వ్యక్తి ఒకరు ఉన్నారు

ఆయనే లక్ష్మణ రావు ఇనాందార్

ఆరెస్సెస్ సంస్థలో మోడీని స్వయం సేవకుడిగా తీసుకొచ్చిన గురువు
ఆ గురువు ప్రభావంతో మోడీ జీవితం మారిపోయింది

వాద్ నగర్ తో మొదలైన మోడీ ఆరెస్సెస్ ప్రస్థానం క్రమంగా గుజరాత్ లోని ఇతర నగరాలకు పాకింది

దేశంలో ఎమర్జెన్సీ విధించినప్పుడు మోడీ మారువేషంలో ఆరెస్సెస్ తరపున చేసిన ప్రచారంతో ఆ సంస్థ అధినాయకుల దృష్టిలో పడ్డాడు

దానితో వారి సిఫార్సుతో మోడీ బీజేపీ లో అడుగుపెట్టారు

అప్పటికే బీజేపీ లో అటల్ బీహారీ వాజ్ పేయి , లాల్ కృష్ణ అధ్వానీ , మురళి మనోహర్ జోషి వంటి హేమాహేమీలు పార్టీ కేంద్ర నాయకత్వంలో ఉన్నారు

ఆరెస్సెస్ లో మోడీకి స్థానం కల్పించిన గురువు లక్ష్మణ రావు ఇనాందార్ అయితే , రాజకీయంగా మోడీకి ఉన్నత స్థానం కల్పించిన గురువు అద్వానీ నే

అప్పటికి అద్వానీ ఆలోచనలు వేరు
రాజకీయంగా ఆయన ప్రధాని పదవి ఆశిస్తున్నారు

గుజరాత్ కే చెందిన మోడీ పార్టీని విజయ పధంలో నడిపిస్తున్న తీరును గమనించి ఆయన్ని ఢిల్లీకి పిలిపించి ఇతర రాష్ట్రాల్లో కూడా గుజరాత్ ను గెలిపించే బాధ్యత అప్పగించారు

కానీ మోడీ ఆలోచన వేరు
గుజరాత్ రాష్ట్రానికే పరిమితం అయి సీఎం అవ్వాలనేది ఆయన కోరిక

అయినా అద్వానీ మాట కాదనకుండా ఢిల్లీ పోయి ఇతర రాష్ట్రాల్లో బీజేపీ ని గెలిపించే బాధ్యతను భుజాన వేసుకున్నాడు

అయితే మోదీకి గుజరాత్ లో అనుకోని అవకాశం వచ్చింది

2000 వ సంవత్సరంలో గుజరాత్ లోని కుచ్ ప్రాంతంలో సంభవించిన భూకంపంలో బాధితులకు సాయం చేయడంలో రాష్ట్ర ముఖ్యమంత్రి కేశూభాయ్ పటేల్ విఫలం అయ్యారని ఆరోపణలు రావడంతో బీజేపీ అధినాయకత్వం ఆయన్ని తప్పించింది మోడీని ముఖ్యమంత్రిగా ప్రతిపాదించింది

ఎన్నికల్లో ముఖ్యమంత్రి అభ్యర్థిగా కాకుండా నేరుగా పార్టీ అధిష్టానం నియామకంతో 2001 లో మోడీ మొదటిసారి గుజరాత్ ముఖ్యమంత్రి అయ్యారు

మోడీ జీవితంలో రాజకీయంగా పెద్ద జర్క్ ఎదుర్కున్న సంఘటన ఏమన్నా ఉందంటే అది గోద్రా అల్లర్లే

దానితో ప్రతిపక్షాల నుంచి తీవ్ర విమర్శలు చెలరేగడంతో మోడీ ముఖ్యమంత్రి పదవికి రాజీనామా చేసి తిరిగి 2002 డిసెంబర్లో ఎన్నికలకు వెళ్లి రెండో సారి ముఖ్యమంత్రి అయ్యారు

2007 , 2012 ఎన్నికల్లో కూడా గుజరాత్ లో బీజేపీ ని గెలిపించడంతో ముఖ్యమంత్రిగా మోడీ నాలుగు సార్లు పనిచేసినట్టు అయ్యింది

ఇదో రికార్డ్
గుజరాత్ మోడల్ డెవలప్ చేయడంతోనే మోడీకి ఈ వరుస విజయాలు సాధ్యమయ్యాయి అంటారు

మోడీ వర్తమానం

అలా అని మోడీ ప్రభంజనం గుజరాత్ రాష్ట్రానికే పరిమితం కాలేదు
2013 లో బీజేపీ అధినాయకత్వం మోడీని ఏకంగా ప్రధాని అభ్యర్థిగా ప్రకటించే స్థాయికి వెళ్ళింది

2014 ఎన్నికల్లో బీజేపీ నాయకత్వంలోని ఎన్డీయే కు ప్రజలు పట్టం కట్టడంతో మోడీ ప్రధానిగా ప్రమాణ స్వీకారం చేసారు

గుజరాత్ లో నాలుగు సార్లు ముఖ్యమంత్రి పదవి చేపట్టి సంచలనం సృష్టించిన మోడీ ప్రధాని పదవిలో కూడా మూడోసారి పరిపాలిస్తూ సుస్థిరమైన నాయకుడిగా పేరు తెచ్చుకుంటున్నారు

అసలేంటీ మోడీ మ్యాజిక్ ?

ఒకప్పుడు కాంగ్రెస్ నాయకులు ఇందిర అంటే ఇండియా .. ఇండియా అంటే ఇందిర అనే నినాదాలు చేసేవారు

ప్రస్తుతం మోడీ శకం నడుస్తుంది
ఎటు చూసినా మోడీ హవా నడిచి నమో అనే పేరు బీజేపీ కి తారక మంత్రంలా పనిచేస్తుంది

పార్టీలో హేమాహేమీలైన నాయకులు ఉన్నప్పటికీ మోడీ బలమైన నాయకుడిగా తన స్థానాన్ని పదిలపర్చుకున్నారు

ఇదెలా సాధ్యం ?

ఒకే వ్యక్తి షుమారు మూడు దశాబ్దాలకు పైగా పార్టీలోనూ , దేశంలోనూ ఎలా చక్రం తిప్పగలుగుతున్నారు ?

పార్టీలో అసమ్మతులను , సీనియర్లను ఎలా కట్టడి చేయగలుగుతున్నారు ?

అమిత్ షా , రాజ్ నాధ్ సింగ్ , నితిన్ గడ్కరీ , వంటి సీనియర్ నాయకులు సైతం బుద్దిగా మోడీని ఫాలో అవడం వెనుక రహస్యం ఏంటి ?

బీజేపీ తరపున ప్రతి విజయానికి మోడీ ఒక్కడికే క్రెడిట్ ఇవ్వడం వెనుక కారణాలు ఏంటి ?

ప్రజల్లోనూ , పార్టీలోనూ మోడీ తిరుగులేని నాయకుడిగా ఎదగడం వెనుక ఉన్న దేవ రహస్యం ఏంటి ?

పై ప్రశ్నలన్నిటికీ మొదటి సమాధానం తిరుగులేని మోడీ నాయకత్వ సామర్థ్యం మాత్రమే

ఎస్ .. నాయకుడిగా ఎదగాలంటే ముందు నాయకత్వ సామర్థ్యం పెంచుకోవాలి
ఆ దిశగా మోడీ తనను తాను మలుచుకున్నారు

ఫిట్నెస్ మంత్ర

మోడీ ఫిట్నెస్ కూడా సుదీర్ఘ కాలం అతడ్ని నాయకత్వ స్థానంలో నిలబెట్టాయి

చక్కటి ఆహార్యం , బాడీ లాంగ్వేజ్ విషయాల్లో మోడీ ప్రత్యేక శ్రద్ద తీసుకున్నారు

మోడీ గుజరాత్ ముఖ్యమంత్రిగా ఉన్న టైములో ఒకరకమైన ఆహార్యాన్ని మెయింటైన్ చేస్తే ప్రధాని అయిన తర్వాత ఇంకో రకమైన ఆహార్యాన్ని మెయింటైన్ చేస్తున్నారు

పదవికి వన్నె తెచ్చే ప్రక్రియలో ఆహార్యం కూడా ఒక భాగమే
అంతేకాని ప్రధాని జీన్స్ ప్యాంట్ , టీ షర్ట్ వేసుకుని తిరిగితే అంతగా నప్పకపోవచ్చు కదా ?

సోషల్ మీడియా

మోడీ విజయంలో సోషల్ మీడియా పాత్ర కూడా ఉంది

ఒకరకంగా చెప్పాలంటే సోషల్ మీడియాని మోడీ వాడుకున్నంతగా మరే నాయకుడు వాడుకోవడం లేదు

అందుకే సోషల్ మీడియా ప్లాట్ ఫార్మ్స్ లో మోడీ టాప్ టెన్ లోపలే ఉంటారు ( ట్విట్టర్ లో ఆయన సెకండ్ ప్లేసులో ఉన్నారు )

ప్రస్తుత డిజిటల్ యుగంలో సోషల్ మీడియా ని వాడుకున్నోడికి వాడుకున్నంత

హిందుత్వ వాదం

మోడీ హిందుత్వ వాదం కూడా భారత్ లో ఆయన్ని తిరుగులేని నాయకత్వ స్థానంలో కూర్చోబెట్టింది

మెజారిటీ వర్గ మనోభావాలను ఒడిసిపట్టుకుని నిర్ణయాలు తీసుకోవడంలో మోడీ సక్సెస్ అయ్యారు

బలహీనమైన ప్రతిపక్షము

మోడీ తిరుగులేని నాయకత్వం వెనుక బలహీనమైన ప్రతిపక్షము ఉండటం కూడా ఒక కారణం

మోడీకి అపోజిట్ లో ఇందిరా గాంధీ ఉంటే పరిస్థితులు ఎలా ఉండేవో కానీ రాహుల్ గాంధీ ఉండటం ఆయనకు కలిసొచ్చిన అంశం

వ్యూహం

గెలుపుకి బలం ఒక్కటే సరిపోదు .. సరైన వ్యూహం కూడా కావాలి
ఈ వ్యూహాలు పన్నడంలో మోడీ ముందుంటున్నారు

ఎన్నికలకు వెళ్ళేటప్పుడు ఆకర్షణీయమైన స్లోగన్లు రూపొందించుకోవడం , స్థానిక నాయకత్వాన్ని సమన్వయము చేసుకోవడం , అభివృద్ధి పధకాల గురించి ప్రజల్లోకి వెళ్లేలా ప్రచారం చేసుకోవడం , లాంటి వ్యూహాల్లో బీజేపీ ముందుంటుంది

మోడీ బలమైన నాయకుడిగా ఎదగడం వెనుక పైన చెప్పినవే కాకుండా మరికొన్ని కారణాలు కూడా ఉండి ఉండొచ్చు

ఏది ఏమైనా ప్రస్తుత పరిస్థితుల్లో మోడీ సూపర్ పవర్ నాయకుడిగా ఎదిగారనడంలో సందేహం లేదు !