వెర్రి వెయ్యి రకాలు అన్నారు పెద్దలు ..అందులో స్కై డైనింగ్ ఒకటి !

స్కై డైనింగ్ మీద మోజుతో కేరళలోని ఇడుక్కి రెస్టారెంట్లో ఓ ఫ్యామిలీ శుక్రవారం నాడు టేబుల్ బుక్ చేసుకుంది . తీరా అది గాల్లో 150 అడుగుల ఎత్తుకి వెళ్లిన తర్వాత హైడ్రాలిక్ సిస్టం ఫెయిల్ అవడంతో అక్కడే నిలిచిపోయింది . నాలుగైదు గంటల తర్వాత ఆఖరికి అగ్నిమాపక సిబ్బంది వచ్చి రెస్క్యూ చేసి గాల్లో నిలిచిన ప్రాణాలను కిందికి దింపాల్సివచ్చింది

చూసారుగా ఈ వార్తని ,

పూటకూళ్ళ తిండి దగ్గర్నుంచి గాల్లో తిండి తినడం వరకు అభిరుచుల్లో , ఆహార అలవాట్లలో కాలం ఎన్నో మార్పులను తీసుకువచ్చింది

పూటకూళ్ళ యుగం ముగిసిన తర్వాత ఒకానొక దశలో మెస్ భోజనాలు బాగా నడిచాయి

రామయ్య మెస్ , సుబ్బయ్య మెస్ , పేరయ్య మెస్ ఇలా రకరకాల పేర్లతో భోజన శాలలు వెలిసాయి

వీటి స్పెషాలిటీ ఏంటంటే ఇంటి తరహా భోజనాలు ఉంటాయి
తక్కువ ధరలో రుచికరమైన ఆహార పదార్దాలు వడ్డించడంతో ఈ మెస్ లకు ఆదరణ పెరిగింది

ఇప్పటికీ బాచులర్స్ కానీ , షటిలర్స్ కానీ ఈ మెస్ భోజనాలనే ప్రిఫర్ చేస్తారు

రెస్టారెంట్ రంగంలో కూడా కార్పొరేట్లు ప్రవేశించడంతో ఆహార అభిరుచులు మారిపోయాయి
పాతవాటికే కొత్త పేర్లు పెట్టి మార్కెట్ చేసుకుంటున్నారు

ఈ మార్పు సవ్య దిశలో పయనిస్తే జనాలకు వచ్చే ఇబ్బంది ఏమీ ఉండదు

కానీ ఆధునిక పోకడల పేరుతో అవే పదార్దాలకు చిత్ర విచిత్రమైన పేర్లు పెట్టి గాల్లో డైనింగులు ఏర్పాటు చేస్తే దాన్ని వెర్రి అంటారు

ప్రస్తుతం ఈ వెర్రి బాగా నడుస్తుంది

మీరు గమనించే ఉంటారు ఈ మధ్య రెస్టారెంట్ రంగంలో కొత్త కొత్త ప్రయోగాలు చేస్తున్నారు

ఇంటి వాతావరణంలో తినే రెస్టారెంట్లు తగ్గి జైలు రెస్టారెంట్లు వెలిసాయి

ఈ జైలు రెస్టారెంట్ల ప్రత్యేకత ఏంటంటే లోపలి భాగం ఇంటీరియర్ మొత్తం అచ్చంగా జైలు మాదిరి ఉంటుందన్నమాట

లంచ్ కానీ డిన్నర్ కానీ చేద్దామని వచ్చే తిండి ప్రియులకు ముచ్చటగా ఓ లాకప్ కేటాయిస్తారు

సదరు లాకప్ లో కూర్చుని ఆర్డర్ ఇస్తే ప్లేట్ అందివ్వబడుతుంది

ఇదేం ఖర్మరా బాబూ అనుకుంటున్నారా ?

కానీ జైలు రెస్టారెంట్లో తినేవాళ్లు మాత్రం ఆ మాట అనుకోవడం లేదు

పైపెచ్చు జైల్లో తిన్నట్టు అనుభూతి ఇచ్చిందని రీల్స్ చేసి మరీ సోషల్ మీడియాలో పెడుతున్నారు

భవిష్యత్తులో ఈ ట్రెండ్ కి ఆదరణ పెరిగితే స్పెషల్ ఆఫర్ కింద రెస్టారెంట్ నిర్వాహకులు కస్టమర్లకు జైలు దుస్తులు ఉచితంగా ఇచ్చినా ఆశర్యపోనక్కర్లేదు

చెట్ల కింద చేసే వన భోజనాల స్థానంలో కొత్తగా జంగిల్ రెస్టారెంట్లు వచ్చాయి
ఈ జంగిల్ రెస్టారెంట్లు ఓ విచిత్రమైన కాన్సెప్ట్

అడవి సెట్టింగ్ వేసి కస్టమర్లకు జంతువులు.. సారీ .. వెయిటర్లు వడ్డిస్తారు అన్నమాట

జనాలు కోరితే ట్రైనింగ్ ఇచ్చి ముందు ముందు జంతువులతో కూడా వడ్డనలు చేయిస్తారేమో చూడాలి
అడవిలో తినాలి అనుకునేవాళ్లు కోసం ఈ ఏర్పాటు అన్నమాట

అరిటాకులో భోజనాలు చేసే స్థానంలో ఒకే పళ్లెంలో మంది మొత్తం తినే మండి భోజనాలు వచ్చాయి

ప్రస్తుతం హైద్రాబాదులో ఈ మండీ భోజనాలు ఫేమస్

ఎంచక్కా మంది మొత్తం కలిసి నేల మీద కూర్చుని ఒకే పళ్లెంలో పదార్దాలను ఆవురావురుమంటూ తినొచ్చన్నమాట

ఆశర్యకరమైన విషయం ఏంటంటే వీకెండ్స్ లో ఈ మండీ టేబుల్స్ కూడా ఖాళీ ఉండవట
దీనికోసం అడ్వాన్స్ బుకింగులు కూడా నడుస్తున్నాయి

విమానం రెస్టారెంట్ , ఇది కొంతవరకు పర్లేదు .. రెస్టారెంట్ మొత్తం విమానం ఆకృతిలో ఉంటుంది

మనం లోపలికి అడుగుపెట్టగానే ఎయిర్ హోస్టెస్ మాదిరి చిరునవ్వులు చిందిస్తూ ఓ అందమైన అమ్మాయి ప్రత్యక్షము అవుతుంది
సీట్ చూపించి మన చేతిలో మెనూ పెట్టి ఆర్డర్ తీసుకుంటుంది

ఫ్లైట్ అటెండెంట్ మాదిరి ఉండే కొంతమంది అమ్మాయిలు వచ్చి ఆర్డర్ సర్వ్ చేస్తారు
ఆ రకంగా విమానంలో తినాలనే మన కోరికను ఇలా తీర్చుకోవచ్చన్నమాట

ఇవన్నీ ఒకెత్తు గాల్లో డైనింగ్ మరొకెత్తు

స్పీడ్ థ్రిల్ బట్ కిల్ అనే ట్రాఫిక్ పోలీసుల హెచ్చరిక లా గాల్లో తిండి థ్రిల్ ఇస్తుందేమో కానీ ఒక్కోసారి ప్రాణాలను కిల్ చేస్తుంది అని కూడా తిండి ప్రియులు తెలుసుకోవాలి

అలాంటి ఒక సంఘటనే నిన్న కేరళలో జరిగింది

కేరళలోని ఇడుక్కి జిల్లా ఆంచల్ టూరిస్ట్ స్పాట్ లో ఓ స్కై డైనింగ్ రెస్టారెంట్ వెలిసింది

ఈ రెస్టారెంట్ ప్రత్యేకత ఏంటంటే మనం ఆర్డర్ ఇచ్చిన మెనూని ప్లాట్ ఫార్మ్ మీద ఉన్న టేబుల్ మీద సర్వ్ చేసిన తర్వాత దానికి అమర్చబడిన క్రేన్ సాయంతో అది షుమారు 150 నుంచి 200 అడుగుల మేరకు ఎత్తుకు గాల్లో ఎగురుతుంది

ఆ టేబుల్ మీద కూర్చున్నవాళ్ళు ఎంచక్కా గాల్లో కూర్చుని తిండి తినడానికి ఈ ఏర్పాట్లు చేసారు

ఇదేదో బావుంది కదా అని గాల్లో తినాలని సరదా పడి ఇద్దరు పిల్లలతో కలిసి నలుగురు పెద్దవాళ్ళు ఈ టేబుల్లో కూర్చున్నారట

క్రేన్ సాయంతో 150 అడుగుల పైకి వెళ్లిన టేబుల్ క్రేన్ లో హైడ్రాలిక్ సిస్టం ఫెయిల్ అవడంతో గాల్లో అక్కడే ఇరుక్కుపోయింది

దాంతో కిందికి దిగే అవకాశం లేకపోవడంతో ఆ ఫ్యామిలీ మొత్తం గాల్లోనే హాహాకారాలు చేయడం మొదలెట్టారట

వీరిలో ఇద్దరు చిన్నపిల్లలు కూడా ఉండటంతో స్పృహ తప్పి పడిపోయారు

మధ్యాహ్నం ఒంటి గంటకు గాల్లో ఆగిపోయిన టేబుల్ నాలుగు గంటలు అయినా కిందికి దిగకపోవడంతో ఆ కుటుంబ సభ్యులు ప్రాణాలు అరచేతిలో పెట్టుకుని ఏడవటం మొదలెట్టారు

క్రేన్ గాల్లో ఇరుక్కుపోవడంతో రెస్టారెంట్ నిర్వాహకులు భయపడి పారిపోయారు

దానితో దారినపోయే జనం చూసి పోలీసులకు తెలియచేయడంతో , పోలీసులు అగ్నిమాపక సిబ్బంది సాయంతో రెస్క్యూ చేసి ఆ కుటుంబ సభ్యులను జాగ్రత్తగా కిందికి దించారు

క్రేన్ లో హైడ్రాలిక్ సిస్టం పనిచేయకపోవడంతో ప్లాట్ ఫార్మ్ గాల్లోనే నిలిచిపోయిందని గుర్తించారు

ఇంకెప్పుడూ స్కై డైనింగ్ చేయకూడదు ,, బుద్దొచ్చిందని ఆ కుటుంబ సభ్యులు బతుకు జీవుడా అనుకుంటూ ఏడుస్తూ ఇంటి దారి పట్టారట

పోలీసులు రెస్టారెంట్ నిర్వాహకుడిపై కేసు నమోదు చేసి దర్యాప్తు చేస్తున్నారు !