వంగవీటి మోహన రంగా బహిరంగ సభ వేదిక మీదకు రాగానే విద్యుత్ సరఫరా ఆపేసారు .. అప్పుడేం జరిగింది ?

ఫోటో చూసారుగా
ఈ ఫోటో వెనుక ఓ చరిత్ర ఉంది

1980 దశకంలో వంగవీటి మోహన రంగా మీద , ఆయన అనుచరుల మీద పోలీసుల అణచివేతలు , నిర్బంధాలు కొనసాగుతున్న రోజులు

అప్పటికే రంగా ముఖ్య అనుచరులను అరెస్ట్ చేసి బందరు కు తరలించిన రోజులు

ఏ క్షణాన అయినా వంగవీటిని మట్టుబెట్టాలని శత్రువులు కాచుక్కూర్చున్న రోజులు

ఈ పరిస్థితుల్లో వంగవీటిని కొన్నాళ్లపాటు అజ్ఞాతంలోకి వెళ్లాల్సిందిగా ఆయన అభిమానులు కోరారు

కానీ వంగవీటి మోహన రంగా అజ్ఞాతంలోకి వెళ్ళడానికి బదులు పోలీసు అణచివేతలకు వ్యతిరేకంగా తన గళం వినిపించటానికే సిద్ధం అయ్యారు

అందుకు విజయవాడ గాంధీ నగరంలోని జింఖానా గ్రౌండ్స్ లో వేదికను నిర్ణయించుకున్నారు

ఓ సాయంత్రం వేళ జింఖానా గ్రౌండ్స్ లో సభ నిర్వహించటానికి ఏర్పాట్లు జరిగాయి

ఈ సభకు విజయవాడ నుంచే కాకుండా చుట్టుపక్కల జిల్లాల నుంచి కూడా ఆయన అభిమానులు తరలి వచ్చారు

అప్పటికే గ్రౌండ్స్ లో జనం తో పాటు పోలీసులు కూడా నిండిపోయారు
ఎన్నడూ లేని రీతిలో కనిపించిన ఆ బందోబస్త్ చూసి జనాలు ఆశర్యపోయారు

మరోపక్క వంగవీటి రంగాను పోలీసులు అరెస్ట్ చేస్తున్నారని , ఆయన ఈ మీటింగ్ కు రాలేరని పుకార్లు బయలుదేరాయి

ఈ మీటింగ్ కి రంగా వస్తారా ?
లేకపోతే పోలీసులు అరెస్ట్ చేసి ఆయన్ని ఆపుతారా ?
గ్రౌండ్లో ఇసకేస్తే రాయాలని జనాల్లో ఎటుచూసినా ఉత్కంఠత , ఉద్వేగం
అందరి ముఖాల్లో టెన్షన్

సభ ఆరు గంటలకు ప్రారంభం అన్నారు కానీ ఏడు గంటలు కావస్తున్నా రంగా జాడ లేదు

అయినా సరే జనం మాత్రం గ్రౌండ్ లోనుంచి కదల్లేదు

ఇటువంటి టెన్షన్ వాతావరణంలో ఎవరో అరిచారు ” రంగా వస్తున్నారు ” అని

అంతే అప్పటిదాకా స్తబ్దుగా ఉన్న గ్రౌండ్లో ” టైగర్ రంగా జిందాబాద్ ” నినాదాలు మిన్నుముట్టాయి

జనసందోహ నినాదాల మధ్య నడుచుకుంటూ వెళ్లి వేదిక వద్దకు వెళ్లారు వంగవీటి

ఆయన మైక్ అందుకోవడంతో అప్పటిదాకా నినాదాలతో హోరెత్తిన మైదానంలో చీమ చిటుక్కుమన్నా వినిపించని నిశ్శబ్దం ఆవరించింది

రంగా ఏం చెప్తాడా ? అని ఆయన అభిమానులు , గ్రౌండ్లో ఉన్న మఫ్టీ పోలీసులు చెవులు రిక్కించి వినడం మొదలుపెట్టారు

వంగవీటి మైక్ అందుకుని ,

“ఈ సభకు నన్ను రానీకుండా చేద్దామని అష్టకష్టాలు పడ్డ పోలీస్ దొరగారికి నేను చెప్పేది ఒకటే .. ప్రజల అభిమానం ఉన్నంతవరకు రంగాను ఆపటం నీ వాళ్ళ కాదు కదా.. నీకు ఆదేశాలు ఇస్తున్న నీ సీఎం వల్ల కూడా కాదు ” అని ఇంకా మాట్లాడబోతుండగా ఒక్కసారిగా విధ్యుత్ సరఫరా నిలిపివేశారు

దీంతో గ్రౌండ్లో కలకలం చెలరేగింది

చుట్టూ చిమ్మ చీకటి
హఠాత్తుగా గాఢాంధకారం అలుముకోవడంతో అక్కడేం జరుగుతుందో అర్ధం కాలేదు

రంగాకు ఎవరైనా హాని తలపెడుతున్నారేమో అని అభిమానులు ఆందోళన పడ్డారు

కానీ మఫ్టీలో ఉన్న పోలీసులు సైతం ఆశర్యపడేలా అకస్మాత్తుగా గ్రౌండ్లో కొంతమంది చేతుల్లోనుంచి బ్యాటరీ లైట్లు వెలిగాయి

చీకట్లోనే ఒక అభిమాని వేదిక వద్దకు పరిగెత్తుకుంటూ వెళ్లి వంగవీటి జనాలకు కనిపించేలా బ్యాటరీ లైట్ చేతిలో పట్టుకుని చూపించాడు

అప్పటికే రంగాకు రక్షణగా ఆయన చుట్టూ వలయంగా అభిమానులు నిలబడ్డారు

బ్యాటరీ లైట్ వెలుగులో రంగాను చూసిన ఆయన అభిమానులు నినాదాలతో హోరెత్తించారు

కొద్దినిమిషాలకు కరెంట్ రావడంతో రంగా తన ప్రసంగాన్ని కొనసాగిస్తూ ,

” చూసావుగా పోలీసు దొరా.. నా అభిమానులే నా సైన్యం ” అంటూ అభిమానులను చూపిస్తూ మాట్లాడారు

ఆ రాత్రే ఇంటలిజెన్స్ నివేదికలు వెళ్లాయి

రంగా ముఖ్య అనుచరులను మచిలీపట్నం తరలించినప్పటికీ సైన్యం మాదిరి అతన్ని నీడలా వెన్నాడుతూ కాపు కాచుకునే అభిమానులు ఉన్నారని.. ప్రస్తుత పరిస్థితుల్లో రంగాను అరెస్ట్ చేస్తే లా అండ్ ఆర్డర్ కంట్రోల్ చేయడం కష్టమౌతుందని రిపోర్ట్స్ ఇచ్చారు

ఇది జరిగిన కొద్దిరోజులకే బందరు రోడ్డు మీద వెళ్తున్న రంగా వాహనాలను పోలీసులు ఆపి ఆయుధాలు ఉన్నాయనే నెపంతో తనిఖీ చేయడం జరిగింది

ఆయుధాలు లేవని నిర్దారించుకున్న పోలీసులు వాహనాలను వదిలివేయడంతో ,
రంగా నిరాయుధుడిగా తిరుగుతున్నాడనే సంకేతం శత్రువులకు చేరాలనే పధకం ప్రకారమే పోలీసులు వాహనాలు తనిఖీ చేసారని ఆయన అభిమానులు ఆరోపించారు

దరిమిలా రంగా పోలీస్ అణచివేతలకు నిరసనగా మరికొన్ని డిమాండ్లతో గవర్నర్ పేటలోని తన ఇంటి ఎదురుగా నిర్మల్ హృదయ్ భవన్ గోడకు అనుకుని ఉన్న పేవ్మెంట్ మీద నిరాహార దీక్ష చేస్తుండగా డిసెంబర్ 26 హత్యకు గురయ్యారనే సంగతి అందరికీ తెలిసిందే !

అయితే తనను హత్య చేస్తారని రంగాకు ముందే తెలుసా ?

అందుకే ఆయన నిరాహార దీక్షలో ఉన్నప్పుడే ముఖ్యమైన అనుచరులకు సంకేతాలు ఇచ్చారా ?

ఈ సందర్భంగా ఉండవల్లితో వంగవీటి మోహన రంగా ఏం చెప్పారు ? లాంటి వివరాలన్నీ తరువాయి భాగంలో తెలుసుకుందాం !

ఈ ఆర్టికల్ షేర్ చేయదల్చుకున్నవారు ఇక్కడ కనిపిస్తున్న వాట్సాప్ , ఫేస్ బుక్ , ఇతర సోషల్ మీడియా ఐకాన్ల ద్వారా చేయొచ్చు