బైసన్ మూవీలో హీరో వివక్ష ఎదుర్కొని నేషనల్ కబడీ ఛాంపియన్ గా ఎలా ఎదిగాడో చూసారుగా .. ప్రపంచ కప్ సాధించిన విమెన్ క్రికెటర్ క్రాంతి గౌడ్ దీ అదే పరిస్థితి .. ఎగతాళి చేసినవారి చేతనే చప్పట్లు కొట్టించుకుంది !

మధ్యప్రదేశ్ లోని మారుమూల గ్రామమైన ఘవారా లో ఓ సామాన్య కుటుంబంలో జన్మించిన ఆడపిల్ల జాతీయ స్థాయిలో క్రికెట్ ఆడి ప్రపంచ కప్ సాధిస్తుందని ఎవరైనా ఊహించగలరా?

ఎవరిదాకో ఎందుకు ఆ గ్రామస్తులే ఊహించలేదు
పైపెచ్చు ఆడపిల్లవు పాచి పనులు చేసుకోక మగరాయుడిలా నీకు క్రికెట్ అవసరమా? అని ఎగతాళి చేసారు

కానీ ఆడపిల్లలు క్రికెట్ ఎందుకు ఆడకూడదు
అబ్బాయిలతో సమానంగా దేశానికి మెడల్స్ ఎందుకు తేకూడదు ? అని ఎదురు ప్రశ్నించింది ఆ పిల్ల

ఆ పిల్ల పేరు క్రాంతి గౌడ్

నవంబర్ 2 న సౌత్ ఆఫ్రికాతో జరిగిన ఉమెన్స్ వరల్డ్ క్రికెట్ ఫైనల్లో గెలిచిన భారత జట్టులో పేస్ బౌలర్ క్రాంతి

మారుమూల గ్రామం నుంచి ప్రారంభం అయిన ఆమె క్రికెట్ జర్నీ బుధవారం ప్రధానితో ముఖాముఖీ సమావేశమై గురువారం రాష్ట్రపతి భవన్లో మెడల్ మెడలో వేసుకుని సత్కారం పొందేదాకా ఎదిగింది

ఈ ప్రయాణంలో ఆమె ఎన్ని కన్నీటి చుక్కలను కార్చిందో ?
ఎన్ని అవమానాలను , హేళనలను ఎదుర్కుందో ?

అవన్నీ క్రికెట్ మీద ఆమెకున్న ప్యాషన్ వల్ల , ఆడపిల్ల అయినా ఆడి సాధించాలన్న పట్టుదల ముందు ఓడిపోయాయి

నేలకు కొట్టిన బంతి మాదిరి రివ్వున పైకి ఎగసింది

క్రాంతి గౌడ్ ప్రయాణం ఎందరో వర్ధమాన క్రీడాకారులకు స్ఫూర్తి కలిగిస్తుంది అనడంలో సందేహం లేదు

ఎగతాళి చేసారు కదా అని ఆమె అక్కడే ఆగిపోయుంటే ఈ రోజు రాష్ట్రపతి భవన్ గడప తాకేది కాదు
ప్రధానితో మాట్లాడే అవకాశం దక్కేది కాదు

పట్టుదలతో విజయాన్ని సొంతం చేసుకున్న ఓ ఆడపిల్లకు ఇంతకన్నా గొప్ప పురష్కారం ఏముంటుంది ?

ఈ రోజు ఈ స్థాయికి ఎదగడం వెనుక గతంలో క్రాంతి చేసిన కఠోర శ్రమ చూడండి

చిన్నప్పుడు అబ్బాయిలు గ్రౌండ్లో ఆడుతుంటే బౌండరీ లైను బయటే నిలబడి గంటల తరబడి చూసేది

క్రాంతి ని గ్రౌండ్లోకి రానిచ్చేవారు కాదు
బంతి బౌండరీ లైనుకి వస్తే పరుగున వెళ్లి బంతిని పట్టుకుని వారి వైపు విసిరేది

మొదట్లో అబ్బాయిలు కూడా ఆమెను కసురుకున్నా బౌండరీ లైన్ దాటిన బంతిని అందించేందుకు సాయం చేస్తుంది కదా అని ఊరుకున్నారు

అలా అబ్బాయిలకు ఆటలో సాయం చేయడం క్రాంతి కి నిత్య కృత్యం అయిపొయింది

తాను మొట్టమొదటిసారిగా క్రికెట్ గ్రౌండ్లోకి ఎలా అడుగుపెట్టింది క్రాంతి గుర్తు తెచ్చుకుంది

ఓ రోజు అబ్బాయిలు ఆట మొదలుపెట్టే టైములో పదకొండవ ప్లేయర్ రాలేదు

దానితో వారు నన్ను ఆ పదకొండో ప్లేయర్ స్థానంలో ఆడమని అవకాశం ఇచ్చారు
అది కూడా ఫీల్డింగ్ వరకే నన్ను పరిమితం చేసారు

అప్పుడు గ్రౌండ్లో ఆట తీరును మొత్తం అవగాహన చేసుకున్నాను
స్పిన్ బౌలింగ్ ఉంటుందని అప్పుడే నాకు తెలిసింది

నేను కూడా ఎలాగైనా గొప్ప క్రికెట్ ప్లేయర్ అవ్వాలని అప్పుడే నేను నిర్ణయించుకున్నాను
నిజానికి అప్పటికే విమెన్ క్రికెట్ పోటీలు కూడా ఉంటాయని నాకు తెలీదు

సరిగ్గా ఆ సమయంలో ఛత్తర్పూర్ జిల్లా క్రికెట్ అసోషియేషన్ కార్యదర్శి రాజీవ్ సర్ ను కలిసి ‘నేను క్రికెట్ ఆడి ఇండియాకి కప్ తీసుకొస్తాను.. నాకు కోచింగ్ ఇప్పిస్తారా ? అంటే ఆయన నవ్వి ‘ అలాగే నీకు కోచింగ్ ఇప్పిస్తాను కానీ ఏ నాటికైనా నువ్వు ప్రపంచ కప్ సాధించి తీసుకురావాలి’ అని సరదాగా అంటూ నన్ను కోచింగ్ అకాడెమీలో చేర్చారు

అకాడెమీలో చేరిన ఆరు నెలల్లోనే నేను సీనియర్ డివిజన్ కి ఆడాను. సంవత్సరానికి అండర్ 19 జట్టుకి సెలెక్ట్ అయ్యాను అని చెప్పింది

అండర్ 19 జట్టులో చక్కటి పెర్ఫార్మెన్స్ చూపించిన క్రాంతి గౌడ్ 22 ఏళ్లకే భారత్ తరపున ప్రపంచ క్రికెట్ టోర్నమెంట్లో ఆడటానికి సెలెక్ట్ అయ్యింది

టోర్నమెంట్లో యావరేజ్ న 18 .11 పరుగులు ఇచ్చి తొమ్మిది వికెట్లు పడగొట్టింది

పాకిస్తాన్ తో జరిగిన మ్యాచులో కీలకమైన మూడు వికెట్లు పడగొట్టిన ఘనత క్రాంతిదే

ఆ రోజు ఆడపిల్లకు క్రికెట్ ఏంటని ఎగతాళి చేసిన గ్రామస్తులే ఈ రోజు క్రాంతి రాష్ట్రపతి భవన్ లో పురష్కారం అందుకుందని తెలిసి చప్పట్లు కొడుతున్నారు

అయినా క్రాంతి ఆ విషయాలను పట్టించుకునే పరిస్థితిలో లేదు
ప్రస్తుతం ఆమె గెలుపును ఆస్వాదిస్తోంది

చివరగా ఆమె ఓ మీడియా ఛానెల్ తో మాట్లాడుతూ ” నిన్న ప్రధాని మోదీజీ తో మాట్లాడినప్పుడు ‘ మా అన్నయ్య మీ అభిమాని .. మిమ్మల్ని కలవాలని అనుకుంటున్నాడు “అని చెప్పినప్పుడు మోదీజీ చిన్నగా నవ్వి ” తప్పకుండా ” అని అన్నారని సంతోషంగా చెప్పింది క్రాంతి గౌడ్

దేశ ప్రధానితో ముఖాముఖీ మాట్లాడేంత అత్యున్నత స్థాయికి ఎదగడమే కాకుండా తన అన్నని సైతం ప్రధానితో మాట్లాడించాలని ప్రయత్నం చేసిన ఈ చెల్లిని పొందిన ఆ అన్న అదృష్టవంతుడే కదా !