ఒకప్పుడు ఉమ్మడి ఆంధ్రప్రదేశ్ కు విజయవాడ సినిమా జంక్షన్ గా ఉండేది
మూడు ప్రాంతాలలో ఏరియాల వారీగా సినిమా డిస్ట్రిబ్యూషన్ జరిగేది
ప్రాంతాల వారీగా సినిమాలు రిలీజ్ అయినప్పటికీ సినిమా ఫలితాన్ని విజయవాడే నిర్దేశించేది
పెద్ద పెద్ద నిర్మాతలు కూడా సినిమా రిలీజ్ రోజున విజయవాడలో టాక్ కోసం ఎదురుచూసేవాళ్ళు
విజయవాడలో బొమ్మ హిట్ అని టాక్ వస్తే ఏపీ మొత్తం బొమ్మ హిట్ అయినట్టే అని భావించేవాళ్లు
అంతెందుకు సూపర్ స్టార్ కృష్ణ తన సినిమా రిలీజ్ మొదటిరోజున విజయవాడ వచ్చి థియేటర్లో షో చూసి సినిమా హిట్ అవుతుందా ? లేదా ఫట్ అవుతుందా అనేది అక్కడికక్కడే లెక్కకట్టి తేల్చి చెప్పేసేవారు
హీరో సినిమాలను హిట్ చేయడంలో అభిమాన సంఘాల పాత్రలు కూడా ఉండేవి
ఆ రోజుల్లో ప్రతి హీరోకి విజయవాడలో అభిమాన సంఘాలు ఉండేవి
ఒక్క విజయవాడలోనే కాదు ఏపీ మొత్తం ఉండేవి . కానీ ఈ సంఘాల ప్రధాన కార్యకలాపాలు అన్నీ విజయవాడ నుంచే జరిగేవి
సినిమా హిట్ కావడంలో అభిమాన సంఘాల పాత్ర గురించి తెలుసు కాబట్టే ఆ రోజుల్లో కొంతమంది హీరోలు వాళ్ళకి సొంత ఆఫీసులు మెయింటైన్ చేసుకోవడానికి డబ్బులు కూడా పంపించేవాళ్ళు
సినిమా రిలీజ్ రోజున ఈ అభిమాన సంఘాల హడావుడి అంతాఇంతా కాదు
అభిమాన నటుడి కటౌట్లకు దండలు వేయడం , పాంప్లెట్లు పంచిపెట్టడం లాంటి రకరకాల పనులు చేసి తమ అభిమానాన్ని చూపించేవాళ్ళు
అప్పట్లో జ్యోతిచిత్ర సూపర్ స్టార్ కూపన్లు పెడితే కృష్ణ కోసమే అభిమానులు ఆ మ్యాగజైన్లు కొని కూపన్లు పంపించి ఆయన్ను సూపర్ స్టార్ ను చేసి తమ అభిమానాన్ని ఘనంగా చాటుకున్నారు
ఆ రోజుల్లో హీరోలకు , అభిమానులకు మధ్య బాండింగ్ అలా ఉండేది
అదే అంశాన్ని ప్రధాన ఇతివృత్తంగా తీసుకుని దర్శకుడు మహేష్ పి ఆంధ్రా కింగ్ తాలూకా కథని రాసుకున్నాడు
అయితే అప్పటి సంఘటనలనే యధాతధంగా రాసుకోకుండా ఒక కొత్త పాయింటుతో రాసుకోవడం ఈ సినిమాకి ప్లస్ అయ్యింది
ఇంతకీ సినిమాలో కధేంటంటే ?
సూర్య ( ఉపేంద్ర ) ఏపీలో ఓ పెద్ద సినీ హీరో
షుమారు 90 సినిమాల దాకా నటించి బ్లాక్ బస్టర్ హిట్లు ఇచ్చి రాష్ట్ర వ్యాప్తంగా అభిమానులను సంపాదించుకుంటాడు
కానీ అతడి సినీ కెరీర్ లో ఫెయిల్యూర్ పర్వం కూడా మొదలౌతుంది
వరుసగా సినిమాలు ఫ్లాప్ అవడంతో ఎలాగైనా వందో సినిమాతో హిట్ కొట్టాలని చూస్తుంటాడు
కానీ అతడి వందో సినిమా పూర్తి కావడానికి మూడు కోట్లు అవసరం పడటంతో నిర్మాత చేతులెత్తేస్తాడు
దాంతో సినిమా ఆగిపోతుంది
తన సినిమాని ఎలాగైనా పూర్తి చేయాలని హీరో సూర్య ఆ మూడు కోట్ల కోసం తెలిసిన నిర్మాతలందర్నీ అప్పు అడుగుతాడు
కానీ ఎవరూ ముందుకు రారు
ఒక నిర్మాత మూడు కోట్లు ఇవ్వడానికి సిద్ధపడతాడు కానీ తన కొడుకు హీరోగా నటిస్తున్న సినిమాలో సూర్యని క్యారక్టర్ ఆర్టిస్టు పాత్రలో నటించమని షరతు పెడతాడు
తన సినిమా కోసం సూర్య ఆ షరతుకి కూడా సిద్ధపడుతున్న సందర్భంలో అతడి అకౌంట్లో మూడు కోట్లు పడతాయి
ఆ డబ్బులు తనకు వీరాభిమాని అయిన సాగర్ అకౌంట్ నుంచి జమ అయినట్టు తెలుసుకుని ఆశర్యపోతాడు
అభిమానిని స్వయంగా కలుసుకోవాలని రాజమండ్రి దగ్గరలో లంక గ్రామంలో ఉంటున్న సాగర్ ఉరికి బయలుదేరతాడు
తన వీరాభిమానిని హీరో కలుసుకుంటాడా ?
సాగర్ సూర్య అకౌంట్లో మూడు కోట్లు వేయడం వెనుక అసలు కారణం ఏంటి ?
సాగర్ మహాలక్ష్మిని ప్రేమిస్తున్న సంగతి తెలుసుకున్న హీరో సూర్య అతడికి ఎలాంటి సాయం చేసాడు ? అనేవి మిగతా కధలో తెలుస్తుంది
సినిమా ఎలా ఉంది ?
పైన చెప్పినట్టు ఒక హీరోకి , అభిమానికి మధ్య ఉండే బాండింగ్ నేపథ్యంలో కథ రాసుకుని సినిమాని తెరకెక్కించారు
హీరోలు అభిమానులకు సాయం చేయడం అందరికీ తెలిసిందే
అయితే అభిమాని హీరోకి సాయం చేయడం కొత్త కాన్సెప్ట్
అందుకే రొటీన్ కధాంశాల జోలికి పోకుండా అభిమాని తన హీరోకి సాయం చేస్తే ఎలా ఉంటుంది అనే కొత్త పాయింట్ బేస్ చేసుకుని దర్శకుడు కథ అల్లుకున్నారు
90 దశకంలో హీరోలు , అభిమాన సంఘాల మధ్య ఉన్న బాండింగ్ తెలిసినవాళ్ళకి ఒక్కోసారి ఇందులో తమను తాము చూసుకుంటారు
ఈ సినిమాలో సాగర్ ( రామ్ పోతినేని ) కూడా హీరో సూర్య అభిమాన సంఘానికి ప్రెసిడెంట్ గా ఉంటూ సినిమా రిలీజ్ రోజున థియేటర్ల దగ్గర సందడి చేయడం లాంటివి చేస్తుంటాడు
ఈ సన్నివేశాలను చూస్తున్నప్పుడు మనకు 90 వ దశకంలోని సంఘటనలు గుర్తుకొస్తాయి
చిన్నప్పట్నుంచి తన అభిమాన హీరోని అభిమానిస్తూ పెరుగుతాడు సాగర్
ఆ అభిమానం ఎంతలా పాకుతుందంటే హీరో సూర్యని తన జీవితంలో ఒక భాగం చేసుకుంటాడు
ఇలాంటి బాండింగ్ నిజ జీవితాల్లో కూడా చూసాం కాబట్టి ఎక్కడా ఫీల్ చెడలేదు
అయితే తన అభిమాన హీరో కోసం మూడు కోట్లు పంపటం అభిమాని కోణంలో బాగానే ఉంది కానీ వంద సినిమాలు చేసిన హీరోకి మూడు కోట్లు అప్పు పుట్టకపోవడం వెనుక సరైన కారణాల్ని మరింత లోతుగా ఎస్టాబ్లిష్ చేయాల్సింది
సినిమా మొత్తం హీరో , అభిమానిల మధ్య బాండింగ్ వరకే పరిమితం చేయకుండా లవ్ ట్రాక్ ను కూడా మిక్స్ చేసారు
అంటే హీరో , అభిమానిల మధ్య ఉండే అభిమానాలు అండ్ హీరో , హీరోయిన్ల మధ్య లవ్ ట్రాక్ సమాంతరంగా నడుస్తాయన్నమాట
ఒకే సినిమాలో రెండు ట్రాకులు ఎదురవడంతో అక్కడక్కడా ప్రేక్షకులు కొద్దిగా కన్ఫ్యూజ్ అవుతారు
ఒక ట్రాక్ లో , హీరో ప్రేమ , అందులో అతడికి ఎదురయ్యే సవాళ్లు , వాటి కోసం చేసే త్యాగాలు ప్రథమార్థంలో కీలక సన్నివేశాలుగా ఉంటాయి
రెండో ట్రాక్ లో తన అభిమాన హీరోకి మూడు కోట్లు పంపడం , హీరోతో ఉన్న బాండింగ్ మొదలైన వాటితో ద్వితీయార్థంలో భావోద్వేగాలను చక్కగా పండించారు
ఈ రెండింటినీ బాలన్స్ చేస్తూ కొద్దిగా జాగ్రత్తగా ఎడిటింగ్ చేసి ఉంటే బాగుండేది
దానికి తోడు ఫస్టాఫ్ కధనంలో వేగం లేకపోవడం , ద్వితీయార్థానికి ముందే అసలు కధలోని కీలక పాయింట్ తెలిసిపోవడం కొంత మైనస్ అవుతుంది
అయినా ఈ చిన్న చిన్న లోపాలను అధిగమించేలా దర్శకుడు కధలో తాను చెప్పదల్చుకున్న పాయింటును సరికొత్తగా చెప్పడంలో పట్టు సాధించాడు
ఎవరెలా చేసారంటే ?
ఇస్మార్ట్ శంకర్ తర్వాత హీరో రామ్ పోతినేని ఖాతాలో సరైన హిట్ ఒక్కటీ పడలేదు
కొద్ది విరామం తర్వాత వచ్చిన ఆంధ్రా కింగ్ తాలూకా రామ్ కి అగ్ని పరీక్ష వంటిదే
గత చిత్రాల్లో రామ్ పూర్తి యాక్షన్ హీరోగా నటించాడు
అయితే ఇందులో పోషించిన సాగర్ పాత్ర ఇస్మార్ట్ శంకర్ లో పోషించిన పాత్రకు పూర్తి వ్యతిరేకంగా ఉంటుంది
ఆంధ్రా కింగ్ లో రామ్ పాత్ర ఆద్యంతం హుషారుగా సాగుతుంది
పాత చిత్రం తాలూకూ ఇమేజ్ ఛట్రం నుంచి బయటికి వచ్చి పల్లెటూరి యువకుడి పాత్రలో పరకాయ ప్రవేశం చేసి బానే మెప్పించాడు
మహాలక్ష్మి పాత్రలో భాగ్యశ్రీ బొర్షే బాగానే చేసింది
ఇక కన్నడ సూపర్ స్టార్ ఉపేంద్ర గురించి కొత్తగా చెప్పేది ఏముంటుంది ?
ఆంధ్రా కింగ్ తాలూకాలో సూర్య పాత్రలో మెప్పించాడు
తండ్రి పాత్రల్లో రావు రమేష్ ది కొట్టిన పిండే
ఆయనకు బలమైన సన్నివేశాలు పడ్డాయి
మురళి శర్మ , రాహుల్ రామకృష్ణ తదితరులు కీలక పాత్రల్లో కనిపించి మెప్పించారు
సాంకేతికంగా కూడా సినిమా బాగానే ఉంది
వివేక్ – మెర్విన్ పాటలు బావున్నాయి
దర్శకుడు మహేష్ కథను రాసుకున్న తీరు ఆసక్తిని రేకెత్తిస్తుంది
అదే ఈ సినిమాకి ప్లస్
ఒక సినిమాలో తన అభిమాన హీరో డైలాగులకు ఇన్స్పైర్ అయి సాగర్ తన జీవితంలో సవాళ్ళను ఎదుర్కున్న తీరు కన్విన్సింగ్ గానే ఉంది
నటీనటులు : రామ్ పోతినేని , భాగ్యశ్రీ బొర్షే , రావు రమేష్ , మురళి శర్మ , రాహుల్ శర్మ , రాహుల్ రామకృష్ణ , తులసి తదితరులు
సంగీతం : వివేక్ – మెర్విన్
సినిమాటోగ్రఫి : సిద్దార్థ నూని
నిర్మాత : నవీన్ యెర్నేని , రవి
రచన , దర్శకత్వం : మహేష్ పి
విడుదల : 27 – 11 – 2025
రేటింగ్ : 3 / 5
