ధర్మేంద్ర బతికే ఉన్నారు .. దయచేసి ఆయన్ని ముందే చంపేయకండి!

బతికున్న మనుషుల్ని చంపేయడాలూ , సెలెబ్రిటీల విషయంలో డాక్టర్లు ఎప్పటికప్పుడు అధికారికంగా ఇచ్చే హెల్త్ బులెటిన్లు చూడకుండా తొందరపాటుతో రిప్పులు , ఓం శాంతులు పెట్టడం గత కొంతకాలంగా సోషల్ మీడియాని పట్టి పీడిస్తున్న సామజిక రుగ్మత

గతంలో ప్రఖ్యాత గాయకుడు ఎస్పీ బాలసుబ్రమణ్యం విషయంలోనూ ఇదే జరిగింది
ఇప్పుడు ప్రముఖ బాలీవుడ్ నటుడు ధర్మేంద్ర విషయంలోనూ ఇదే జరిగింది

తమ కుటుంబ సభ్యుడు త్వరగా కోలుకోవాలని ప్రార్థనలు చేసే ఆ ఇంటి సభ్యులకు నిజమైన గుండె కోత కలిగించే వార్తలు ఇవే

అందుకే ధర్మేంద్ర కూతురు మా నాన్న బతికే ఉన్నాడు .. దయచేసి ఆయన్ని ముందే చంపేయకండి అని రెండు చేతులూ జోడించి సోషల్ మీడియాని వేడుకోవాల్సి వచ్చింది

సరే , సోషల్ మీడియా అంతా ఎక్కువ భాగం కాపీ పేస్ట్ లో , ఫార్వార్డింగ్ మెసేజిలో , ఫేక్ మెసేజిలో ఉంటాయి కాబట్టి అజ్ఞానం అనుకోవచ్చు

కానీ మెయిన్ స్ట్రీమ్ మీడియాకి ఏమైంది ?

కొన్ని నేషనల్ ఛానల్స్ లోనూ , కొన్ని తెలుగు న్యూస్ ఛానల్స్ లోనూ నిజ నిర్దారణ చేసుకోకుండా ధర్మేంద్ర మరణించారని ఫేక్ వార్తలను ఎలా ప్రసారం చేసాయి ? ఎలా ప్రచారం చేసాయి ?

ఈ ఫేక్ వార్తల వల్ల మహా అయితే ఓ పదిమంది ధర్మేంద్ర కుటుంబ సభ్యులు బాధపడతారు అనుకోవడానికి లేదు

ధర్మేంద్రకు దేశ వ్యాప్తంగా లక్షలాదిమంది అభిమానులు ఉన్నారు

అంతమంది అభిమానులున్న ఓ సెలెబ్రిటీ ఆరోగ్య వార్తలు ప్రసారం చేసేటప్పుడు తమకు అందిన సమాచారంలో ఖచ్చితత్వాన్ని నిర్దారించుకోవాల్సిన అవసరం లేదా ?

టిఆర్పి కోసం , ఆయన మరణ వార్తను అందరికన్నా తామే ముందు అందించామని ఎక్స్క్లూజివ్ వార్తగా ప్రపంచానికి తెలియాలనే ఆతృతలో బతికున్న మనిషిని ఎలా చంపేస్తారు ?

ఒక గొప్ప నటుడి ఆరోగ్య వార్తల విషయంలో నిజాలు తెలుసుకోవడానికి ఆ మాత్రం సమయం కేటాయించలేరా ?

ఎందుకీ తొందరపాటు ?

గతంలో తెలుగు సినీ నటుడు కోట శ్రీనివాస రావు కూడా తాను బతికే ఉన్నానని కన్నీటితో వీడియోలో చెప్పుకోవాల్సిన పరిస్థితి వచ్చింది

బతికున్న మనిషికి తన మరణం గురించి సోషల్ మీడియాలో వచ్చే సంతాప సందేశాలు చదవడం కన్నా పెద్ద శిక్ష ఇంకోటి ఉంటుందా ?

ఈ వార్తలు చూసి బతకాలనుకున్న మనిషికి కూడా జీవితం మీద విరక్తి పుట్టకుండా ఉంటుందా ?

ఇలాంటి అత్యుత్సాహపు ఫేక్ వార్తలను చూసే కదా సిరివెన్నెల సీతారామ శాస్త్రి గారు అగ్గితోటి కడుగు ఈ సిగ్గులేని సమాజాన్ని అని రాసారు

ముంబైలోని బ్రీచ్ క్యాండీ హాస్పిటల్ డాక్టర్లు ఈ రోజు ఉదయం ఒక బులెటిన్ విడుదల చేస్తూ , “ఈ రోజు బుధవారం ఉదయం 7 .30 గంటలకు ధర్మేంద్రను డిశ్చార్జ్ చేయడం జరిగింది .. ఇంటిదగ్గరే ఆయనకు చికిత్స చేయాలనీ కుటుంబ సభ్యులు కోరినందున ఇకపై ట్రీట్మెంట్ వారు కోరిన ప్రకారమే జరుగుతుంది ” అని ప్రకటించారు

ధర్మేంద్ర కొడుకు సన్నీ డియోల్ ధర్మేంద్రను తదుపరి చికిత్సల కోసం అంబులెన్సు లో తన ఇంటికి తీసుకెళ్లారు
(ఈ ఆర్టికల్ రాసే సమయానికి ధర్మేంద్ర సేఫ్ గా ఉన్నారు )

ప్రస్తుతం ధర్మేంద్రకు 89 ఏళ్ళ వయసు
డిసెంబర్ 8 న ఆయన 90 వ ఏటలోకి ప్రవేశిస్తారు

ధర్మేంద్ర గారూ ఆరోగ్యంగా త్వరగా కోలుకోండి !