సినిమాలను పైరసీ చేసే ఐ బొమ్మ రవి జీవితం వెనుక కూడా ఓ సినిమా కథ ఉంది !

హీరోది మధ్యతరగతి కుటుంబ నేపధ్యం
సంపాదన అంతంత మాత్రంగా ఉన్న హీరో జీవితంలోకి ధనవంతుల బిడ్డ హీరోయిన్ రూపంలో వస్తుంది

హీరోది పేదరికం బ్యాక్ గ్రౌండ్ .. భార్యది రిచ్ ఫ్యామిలీ
సంపాదన లేని హీరో అత్తింట్లో అవమానాల పాలు అవుతాడు
భార్య , అత్తమామల సూటిపోటి మాటలకు గురవుతాడు

ఎలాగైనా సంపాదించి అత్తింట్లో గర్వంగా తలెత్తుకుని తిరగాలని కసిగా నిర్ణయించుకుని ఇల్లు వదిలిపెట్టి వెళ్ళిపోతాడు

షుమారు తొమ్మిది సంవత్సరాల తర్వాత భార్యకు ఫోన్ చేసి , వేల కోట్లలో ఉన్న తన ఆస్తి వివరాలు చెప్తాడు

భార్య ఆశర్యపోతుంది
ఎలాగైతేనేమి భర్త సంపాదన పరుడు అయ్యాడని సంతోషపడుతుంది
ఇంటికి వచ్చేయమంటుంది

అప్పుడు అతడు ,

“ఇంటికి వస్తాను కానీ నీతో కాపురం చేయడానికి కాదు , విడాకుల కోసం.. నా జేబులో రూపాయి లేని రోజున మీరందరూ ఎగతాళి చేసారు.. ఆ కసితో ఇప్పుడు నేను రెండు మూడు తరాలకు సరిపడా సంపాదించాను .. విడాకులకు రెడీగా ఉండు . వస్తున్నాను” అని చెప్పాడు

కట్ చేస్తే

భార్య ఉక్రోషంతో అతడు వస్తున్న సమాచారాన్నిపోలీసులకు చేరవేసింది

ఆ మర్నాడే షుమారు తొమ్మిది సంవత్సరాల తర్వాత పైరసీ ద్వారా వేల కోట్లు సంపాదించిన సైబర్ నేరగాడిని అరెస్ట్ చేసిన పోలీసులు అనే వార్తలు బయటికి వచ్చాయి

సినిమా స్టోరీలా ఉంది కదా ? నో
ఇది వాస్తవంగా జరిగిన సంఘటన

ఇందులో హీరో ఐ బొమ్మ రవి

సంపాదన కోసం ట్రాక్ తప్పిన తన జీవితం వెనుక భార్య హేళనలు ఉన్నాయని చెప్తున్నాడు

ఆశర్యంగా అతడ్ని పోలీసులకు పట్టించింది కూడా భార్యే

భార్యతో ఛాలెంజ్ చేసి వేల కోట్లు సంపాదించిన రవి అదే భార్య వల్ల పోలీసులకు దొరకడంతో ముగింపు ట్రాజెడీ అయ్యింది

ఒక్కసారి రవి ఫ్లాష్ బ్యాక్ లోకి వెళ్తే ,

2016 లో మధ్యతరగతి నేపధ్యం ఉన్న రవికి కలవారి అమ్మాయితో హైద్రాబాదులో వివాహం జరిగింది

వివాహం జరిగిన మర్నాటినుంచి రవికి అత్తింటి ఆరళ్ళు మొదలయ్యాయి
గృహ హింసలో ఇదో కొత్త మలుపు

అత్తింటి ఆరళ్ళు నవ వధువుకే కాదు వరుడికి కూడా ఉంటాయని రవి చెప్తున్నాడు

దాంతో ఆ వేధింపులు తట్టుకోలేక ఎలాగైనా సంపాదించి అత్తింట తన పరువు నిలబెట్టుకోవాలని ఇంటినుంచి వెళ్ళిపోయాడు

వెబ్ డిజైనర్ గా చిన్నాచితకా ప్రాజెక్టులకు పని చేసిన అనుభవంతో రవి ఏకంగా ఐ బొమ్మ , బప్పం పేరుతొ పైరసీ సైట్ ఓపెన్ చేసాడు

సైట్ ఓపెన్ చేసిన కొద్ది నెలలకే బెట్టింగ్ యాప్ ల నుంచి అతడికి ఊహించనంత డబ్బులు వచ్చాయి

దాంతో అతడు తన మకాం ను నెదర్లాండ్స్ కు మార్చాడు

తాను ఎక్కడ ఉంటే అక్కడనుంచే సైట్లను రన్ చేసే ఏర్పాట్లు చేసుకున్నాడు

షుమారు 50 లక్షలమంది డేటా ను సైబర్ నేరగాళ్లకు విక్రయించడంతో అతడికి 20 కోట్లకు పైగా కుప్పలుతెప్పలుగా డబ్బులు వచ్చి పడ్డాయి

దాంతో పోలీసులకు దొరక్కుండా కొంతకాలం కరీబియన్ దీవులకు వెళ్ళిపోయి అక్కడ నుంచి కూడా సైట్ రన్ చేసాడు

యెంత సంపాదించినా అతడి మూలాలు హైద్రాబాదులోనే ఉన్నాయి

అందుకే భార్యకు తానేంటో చూపించి , కూకట్పల్లిలో ఉన్న ఫ్లాట్ అమ్మి విదేశాల్లోనే సెటిల్ అయిపోదామని ఫ్రాన్స్ నుంచి హైద్రాబాదుకి వచ్చి ప్రేమించి పెళ్లాడిన భార్య ఇచ్చిన సమాచారంతో పోలీసులకు దొరికిపోయాడు

ఐ బొమ్మ రవి పోలీసులను ఎంతలా ముప్పతిప్పలు పెట్టాడంటే దమ్ముంటే నన్ను పట్టుకోండి చూద్దాం అని పోలీసులకే సవాల్ విసిరాడు

మరొపక్కన ఐ బొమ్మ ఎఫెక్ట్ తో కోట్లు ఖర్చు పెట్టిన నిర్మాతలు నష్టాల్లో కూరుకుపోయి లబోదిబో అంటున్నారు

ఈ పరిణామాలతో ఎలాగైనా ఐ బొమ్మ నిర్వాహకుడిని పట్టుకోవాలని బడా నిర్మాతలు , పోలీసులు ఎదురు చూసారు

వెదకబోయిన తీగ కాలికి తగిలినట్టు ఐ బొమ్మ రవి హైదరాబాద్ వచ్చి పోలీసులకు దొరికిపోయాడు

ఐ బొమ్మ రవి దొరికిపోవడంతో చిరంజీవి , నాగార్జున , రాజమౌళి లాంటి సినీ రంగ ప్రముఖులు సీపీ కార్యాలయానికి వచ్చి సంతోషంతో ప్రకటనలు ఇచ్చారు

కొసమెరుపు : ఐ బొమ్మ రవిని అరెస్ట్ చేసారని సినీ పెద్దలు సంతోషపడుతున్నారు కానీ అసలు సమస్య పరిష్కారం కాలేదని గమనించలేకపోతున్నారు

ఠాగూర్ సినిమాలో చిరంజీవిని అరెస్ట్ చేద్దామనుకున్నప్పుడు ఓ పోలీస్ అంటాడు.. చిరంజీవి ఒక్కడ్ని పట్టుకుంటే సరిపోదు .. అతడి వెనుక ఉన్న నెట్ వర్క్ ని కూడా పట్టుకోవాలి అని

అలా ఐ బొమ్మ రవిని అరెస్ట్ చేయడంతో సమస్య పరిష్కారం అయినట్టు కాదు .. అతడి వెనుక ఇప్పటికే పెద్ద నెట్ వర్క్ ఉంది .. పోలీసులు అరెస్ట్ చేసి తీసుకెళ్తున్నప్పుడు రవి ముఖంలో కనిపించిన ఆత్మ విశ్వాసం ఎవరైనా గమనించారా ?

ప్రస్తుతం అతడు కోట్లకు అధిపతి .. ఐ బొమ్మ పేరుతొ అతి పెద్ద నెట్ వర్క్ ను ఏర్పాటు చేసుకున్నాడు .. బోలెడంత వయసు ఉంది .. చేతిలో తనకు మాత్రమే తెలిసిన స్కిల్డ్ వర్క్ ఉంది .. ఆ విద్య తన చేతిలో ఉన్నంతకాలం ఇలాంటి అరెస్టులు తననేమీ చేయలేవు అన్నట్టుగా ఉన్నాయి అతడి చూపులు

పైరసీ నేరానికి ఉరిశిక్ష ఏమీ వేయరు . మహా అయితే రిమాండ్ , తర్వాత బెయిల్ ఉంటుందని అతడికి తెలుసు..అందుకే విడుదల అయిన తర్వాత ఏ విజయ్ మాల్యాలానో విదేశాలకు పారిపోయి తిరిగి నీ బొమ్మ అనే సైట్ ఓపెన్ చేసినా చేస్తాడు

పైగా ఐ బొమ్మ రవికి సోషల్ మీడియాలో విపరీతమైన మద్దతు వస్తుంది
అతడి చేష్టలను వ్యతిరేకిస్తున్న వాళ్ళు ఎంతమంది ఉన్నారో , అతడికి మద్దతు ఇస్తున్నవాళ్ళు కూడా అంతేమంది ఉన్నారు

సినిమా వాళ్ళు చేసే దోపిడీ ముందు ఐ బొమ్మ చేసింది అసలు దోపిడీనే కాదు అని వాదిస్తున్నారు

మరేమి చేయాలి ?

జనజీవన స్రవంతిలో కలిసిన నక్సలైట్లకు కోట్లు రివార్డ్ ఇచ్చి పునరావాసం కల్పించినట్టు ఐ బొమ్మ రవి లోని టాలెంటుని సైబర్ నేరాలకు విరుగుడుగా వాడుకోవాలి .. చట్టబద్ధంగా చర్యలు తీసుకుంటూనే ప్రభుత్వం , పోలీసులు , సినీ పెద్దలు అతడ్ని మోటివేట్ చేసి ఆ దిశగా ప్రయత్నాలు చేస్తే కొంత ఫలితం ఉండొచ్చు

గుడ్డిగా అతడ్ని సమర్ధించకుండా , అతడి చేతిలో ఉన్న విద్యను సత్కార్యానికి ఉపయోగించేలా సోషల్ మీడియా నుంచి కూడా వత్తిడి వస్తే అతడి ఆలోచనల్లో కొంత మార్పు రావచ్చు

ఈ సమస్యకు ఉత్తమమైన పరిష్కారం అతడిలో మార్పును తీసుకురావడమే!