ఒక నిర్మాత ఐ బొమ్మ రవిని ఎన్కౌంటర్ చేయాలన్నారు .. ఒక నటుడు రవికి న్యాయం అందించటానికి సిద్ధం అంటున్నారు .. అసలేం జరుగుతుంది ?

హైదరాబాద్ సీపీగా సివి ఆనంద్ ఉన్నప్పుడు సినీ ఇండస్ట్రీకి చెందిన నటులు , నిర్మాతలు ఆయన్ని కలిసి ఐ బొమ్మ పైరసీ వల్ల తాము కోట్లలో నష్టపోతున్నామని , వెంటనే నిర్వాహకుడి ఆచూకీ కనిపెట్టి అరెస్ట్ చేయాల్సిందిగా విజ్ఞప్తి చేసారు

సదరు సినీ పెద్దల విజ్ఞప్తికి సీపీ కూడా సీరియస్ గా స్పందించారు
ఐ బొమ్మ పేరుతొ పైరసీ చేస్తున్న నిర్వాహకుడిని ఎక్కడున్నా పట్టుకుని త్వరలోనే అరెస్ట్ చేస్తామని చెప్పారు

సీపీ ప్రకటన దరిమిలా ఐ బొమ్మనిర్వాహకుడు తన వెబ్ సైట్ లో ఓ ప్రకటన చేస్తూ , తనని పట్టుకోవడం ఎవరి వల్లా కాదని పోలీసులకే సవాల్ విసిరాడు

అప్పటికి ఐ బొమ్మ నిర్వాహకుడు ఎవరో , ఎలా ఉంటాడో , ఎక్కడుంటాడో కూడా ప్రపంచానికి తెలీదు

ఈ పరిస్థితుల్లో సీవీ ఆనంద్ హోమ్ శాఖకు ప్రమోట్ అవగా , హైదరాబాద్ సీపీ గా సజ్జన్నార్ పదవీ బాధ్యతలు స్వీకరించారు

ఆయన పదవీ బాధ్యతలు స్వీకరించిన కొద్ది రోజులకే సైబర్ నేరగాళ్లు ఏకంగా అయన పేరుతోనే కొంతమంది బాధితులను డబ్బుల కోసం వాట్సాప్ ద్వారా బెదిరించారు

దీనితో ఆయన సైబర్ నేరాలపై ప్రత్యేక దృష్టి పెట్టారు
ఈ క్రమంలో పైరసీ ఇస్స్యూ మీద సినీ పెద్దలు చేసిన విజ్ఞాపనను కూడా పరిశీలించారు

అయితే అనుకోకుండా వెదకబోయిన తీగ కాలికి తగిలినట్టు ఐ బొమ్మ రవి ఆచూకీ తెలిసింది
రవిని పట్టించింది కూడా అతడి భార్యే కావడం గమనార్హం

రవి దొరకడంతో సినీ పెద్దలు సంబరాలు చేసుకుని సంతోషపడిపోయారు

అప్పటికప్పుడు చిరంజీవి , నాగార్జున , రాజమౌళి లతో పాటు కొంతమంది నిర్మాతలు సజ్జన్నార్ కార్యాలయానికి వెళ్లి అభినందనలు చెప్పారు

ఐ బొమ్మ పేరుతొ ఇంతకాలం తమకు కంటి మీద కునుకు లేకుండా చేసింది ఓ సామాన్య కుర్రాడు అని తెలిసి ఆశర్యపోయారు

అమీర్ పేటలో నేర్చుకున్న వెబ్ డెవలపర్ కోర్స్ తో కోట్లకు అధిపతి అవడమే కాకుండా ఏకంగా కరీబియన్ దీవుల నుంచి ఐ బొమ్మను ఆపరేట్ చేస్తున్నాడని తెలిసి షాక్ అయ్యారు

ఇన్నాళ్లు తమకు కోట్లలో నష్టం కలిగించింది ఇంత చిన్న కుర్రాడా ? అని పళ్ళు పటపటా నూరారు

ఆ ఆవేశంలో సి కళ్యాణ్ అనే ఓ నిర్మాత అయితే ఏకంగా రవిని ఎన్కౌంటర్ చేయాలన్నారు

మరోపక్క అప్పటికే రవి అరెస్ట్ పట్ల సోషల్ మీడియాలో సానుభూతి వెల్లువెత్తింది

సినిమాల పేరుతొ నిర్మాతలు , థియేటర్ ఓనర్లు ప్రేక్షకులను దోపిడీ చేస్తున్నదానితో పోలిస్తే రవి చేసింది అసలు దోపిడీనే కాదని మండిపడ్డారు

కొత్త సినిమా రిలీజ్ అవుతుందంటే చాలు బెంజ్ కారుల్లో బడా నిర్మాతలంతా దర్జాగా సీఎం లను నేరుగా కలిసి తమ పెట్టుబడికి రెండింతలు లాభం వచ్చేలా టికెట్ రేట్లు పెంచుకోవడానికి అనుమతులు తెచ్చుకుంటున్నారు

ఇది దోపిడీ కాదా ? థియేటర్ దగ్గర టికెట్ రేట్ కంటే పైసా ఎక్కువకి అమ్మినా బ్లాక్ టికెట్లు అమ్ముతున్నాడని అరెస్ట్ చేస్తారు. అదే టికెట్లను నిర్మాతలు ఎక్కువ రేట్ కు అమ్ముకోవడం బ్లాక్ టికెట్లు అమ్ముకోవడం కిందికి రాదా ?

థియేటర్లో వాటర్ బాటిల్ 60 రూపాయలకు , పాప్ కార్న్ ప్యాకెట్ 150 రూపాయలకు అమ్ముకోవడం దోపిడీ కాదా ?

ఇన్ని దోపిడీలు కళ్ళముందు బహిరంగంగా కనిపిస్తుంటే వాటిని అరికట్టాల్సింది పోయి బడా నిర్మాతలు అడిగిందే తడవు రవిని అరెస్ట్ చేసి అదేదో ఘనకార్యం చేసినట్టు సంబరాలు చేసుకోవడం సబబేనా అని ప్రశ్నిస్తున్నారు

న్యాయం రవికి ఒకలా , సినిమా పెద్దలకు ఒకలా ఉండటం న్యాయమేనా అని అడుగుతున్నారు

పైగా రవి తమదగ్గర్నుంచి నయాపైసా తీసుకోకుండా సినిమాలు చూపించాడని అతడికి మద్దతుగా పోస్టులు పెట్టారు

ఈ పరిస్థితుల్లో పుండు మీద కారంలా నిర్మాత సి కళ్యాణ్ రవిని ఎన్కౌంటర్ చేయాలని డిమాండ్ చేయడంతో సోషల్ మీడియా మరోసారి భగ్గుమంది

రవిని ఎన్కౌంటర్ చేయడమే కరెక్ట్ అని ఆ నిర్మాత భావిస్తే సినిమా పేరుతొ కోట్లు ఖర్చుపెట్టి ప్రేక్షకులను దోపిడీ చేస్తూ దందా చేస్తున్న బడా నిర్మాతలను కూడా ఎన్కౌంటర్ చేయాలని పోస్టులు పెట్టారు

ఈ పరిణామాల నేపథ్యంలో ఐ బొమ్మ రవికి న్యాయ సహాయం అందించటానికి సిద్ధం అని నటుడు , న్యాయవాది సీవీఎల్ నరసింహారావు సోషల్ మీడియాలో పోస్ట్ పెట్టడం సంచలనం కలిగించింది

ఈయన క్యారక్టర్ ఆర్టిస్టుగా చాలా సినిమాల్లో నటించారు
స్వతహాగా సీవీఎల్ వృత్తి రీత్యా హైకోర్టు న్యాయవాది .. ప్రవృత్తి రీత్యా సినీ నటుడు

సినీ రంగానికే చెందిన సీనియర్ ఆర్టిస్ట్ సైతం రవికి మద్దతుగా రంగంలోకి దిగటంతో ఐ బొమ్మ రవి సినిమా కొత్త మలుపు తిరిగింది

చిత్ర పరిశ్రమకు చెందిన నిర్మాతలు సైతం సీవీఎల్ నిర్ణయాన్ని జీర్ణించుకోలేకపోతున్నారు

సినీ పరిశ్రమకే చెందిన సీవీఎల్ సైతం ఐ బొమ్మ రవికి మద్దతుగా న్యాయ సహాయం అందించటానికి సిద్ధపడ్డారు అంటే మాములు విషయం కాదు

రవికి మద్దతుగా సోషల్ మీడియానే కాదు ,కొంతమంది పెద్దలు కూడా రంగంలోకి దిగుతున్నారని తెలుస్తుంది

త్వరలో వైట్ కాలర్ ముసుగులో పెద్దమనుషులు చేస్తున్న దోపిడీలు కూడా బయటపెట్టేందుకు ఇప్పటికే కొన్ని వర్గాలు ప్రయత్నిస్తున్నాయని తెలుస్తుంది

ఇదిలా ఉండగా ఈ కేసు ఇంతటితో ఆగదని , ఐ బొమ్మ రవి సినిమాలో ముందు ముందు మరిన్ని ట్విస్టులు ఉంటాయని చిత్ర పరిశ్రమకే చెందిన కొంతమంది అంతర్గత సమావేశాల్లో చెప్పుకుంటున్నారు !