పైరసీ సినిమాలు చూసే ఓ వందమందిని అరెస్ట్ చేయండి – దేవుడికి లేని బాధ మీకెందుకు ? ఒక రామ్ గోపాల్ వర్మ.. రెండు వివాదాస్పద పోస్టులు !

ఐడెంటిటీ క్రైసిస్ అనేది మా చెడ్డది
అందులోనూ విజయ శిఖరాలకు చేరుకొని అకస్మాత్తుగా ఫెయిల్యూర్ అనే అగాధంలో పడ్డవాడి ఐడెంటిటీ క్రైసిస్ మరీ చెడ్డది

1989 లో ఓ 26 ఏళ్ళ కుర్రాడు తనని తాను ప్రూవ్ చేసుకోవాలనే కసితో , పట్టుదలతో శివ సినిమా తీసి తెలుగు చిత్ర పరిశ్రమలో ట్రెండ్ సెట్టర్ గా నిలిచాడు

ఆ కుర్రాడి వల్ల నాగార్జున సినీ కెరీర్ గొప్ప మలుపు తీసుకుంది
శివ అందించిన విజయంతో ఆ కుర్రాడు వెను తిరిగి చూసుకునే అవసరం లేకపోయింది

టాలీవుడ్ తో మొదలైన ప్రయాణం బాలీవుడ్ దాకా దూసుకుపోయింది
ఎంతోమంది యువ దర్శకులు ఈ కుర్రాడికి శిష్యులుగా మారారు

ఆ కుర్రాడి పేరు రామ్ గోపాల్ వర్మ

కాలం ఎప్పుడూ ఒకలా ఉండదు
నూరు విజయాలు సాధించిన వ్యక్తి ఒక్క పరాజయాన్ని తట్టుకోలేకపోయాడు

పర్యవసానంగా గోడకు కొట్టిన బంతిలా ఎక్కడ్నుంచి ప్రయాణం మొదలెట్టాడో అదే ప్రాంతానికి ఒంటరిగా వచ్చి పడ్డాడు

శివ లాంటి ట్రెండ్ సెట్ట్టింగ్ సినిమాని తీసిన రామ్ గోపాల్ వర్మ ఆఖరికి హీరోయిన్ల తొడలు , పాదాలు చూపించే సినిమాలు తీయడానికి పరిమితం అయ్యాడు

దాంతో అతడి సినీ కెరీర్ అగాధం లోకి దిగజారిపోయింది
పరాజయం తాలూకూ వత్తిడిలోనుంచి ఐడెంటిటీ క్రైసిస్ పుట్టింది

దాని పర్యవసానమే ప్రజల దృష్టి తన మీద పడాలని పదే పదే వివాదాస్పద పోస్టులు పెడుతూ సోషల్ మీడియాలో వైరల్ అవుతూ ఉంటారు

ఇప్పుడీ ఉపాధ్ఘాతం ఎందుకంటే రామ్ గోపాల్ వర్మ మళ్ళీ వివాదాస్పద పోస్టులు పెట్టి టాక్ ఆఫ్ ది సోషల్ మీడియా అయ్యారు

వాటిలో మొదటిది పైరసీ చేసేవాడికన్నా చూసేవాళ్ళని ఓ వందమందిని అరెస్ట్ చేసి వాళ్ల పేర్లను పబ్లిక్ చేస్తే ఇంకెవరూ పైరసీ చూడటానికి సాహసం చేయరనేది ఆయన వింత వాదన

రెండోది ఇటీవల వారణాసి మూవీ ఫంక్షన్ లో దేవుడ్ని నమ్మనని ఎస్ ఎస్ రాజమౌళి చేసిన వివాదాస్పద వ్యాఖ్యలను సమర్థిస్తూ ఇంకో పోస్ట్ పెట్టారు

ఈ మధ్య పోలీసులు ఐ బొమ్మ పైరసీ నిర్వాహకుడు ఇమ్మడి రవిని అరెస్ట్ చేసిన సంగతి తెలిసిందే

రవి అరెస్ట్ దరిమిలా సోషల్ మీడియా అతడికి మద్దతుగా పోస్టులు పెట్టింది

సినిమాలకు ఎక్కువ రేట్లు పెట్టి నిర్మాతలు చేస్తున్న దోపిడీ ముందు , పాప్ కార్న్ , వాటర్ బాటిల్ లాంటి పదార్దాలను ఎక్కువ రేట్లకు అమ్ముకుంటున్న థియేటర్లతో పోలిస్తే సినిమాలను ఉచితంగా చూపిస్తున్న ఐ బొమ్మ రవిది పెద్ద దోపిడీ కాదని సోషల్ మీడియాలో విమర్శలు వెల్లువెత్తాయి

దీనికి కౌంటర్ గా రామ్ గోపాల్ వర్మ సోషల్ మీడియాలో స్పందించారు

BMW కారు రేటు ఎక్కువగా ఉంది కదా అని షో రూమ్ దోపిడీ చేసి కార్లను పేదవాళ్ళకి ఉచితంగా పంచలేము కదా ?

బంగారం రేటు పెరిగిందని కొనడం మానేసారా ? అలాంటివాళ్ళు సినిమా టికెట్ రేట్లు పెరిగితే మాత్రం ఎందుకు గొంతు చించుకుంటారు ? అని ఆయన ప్రశ్నించారు

పైరసీ సమస్యకు కూడా ఆయన వింతైన పరిష్కారం ఒకటి చెప్పారు

పైరసీని ఎవరూ ఆపలేరని , ఒకడ్ని అరెస్ట్ చేస్తే ఇంకోడు పైరసీ మొదలెడతాడని చెప్పారు

పైరసీ చేసేవాడు చట్టానికి దొరక్కుండా ఎక్కడో దీవుల్లో కూర్చుని ఆపరేట్ చేస్తాడు .. అలాంటి వాడ్ని పట్టుకోవడం చాలా కష్టం .. అందుకే పైరసీ బొమ్మలను చూసే ఓ వందమందిని అరెస్ట్ చేసి పబ్లిక్ లో వాళ్ల పేర్లను ఉంచితే ఇంకోడు పైరసీ బొమ్మ చూడటానికి సాహసం చేయడని కొత్త లాజిక్కు లేవనెత్తారు

రామ్ గోపాల్ వర్మ స్పందన పట్ల నెటిజన్లు మండిపడుతున్నారు

ఇదిలా ఉండగా పుండుమీద కారం చల్లినట్టు ఇటీవల వారణాసి మూవీ ఫంక్షన్ లో దేవుడి మీద నమ్మకం లేదని రాజమౌళి చేసిన వ్యాఖ్యలను సమర్థిస్తూ ‘ దేవుడికే రాజమౌళితో సమస్య లేనప్పుడు మీకెందుకు బీపీలు , అల్సర్లు వస్తున్నాయని’ హిందూ సంఘాలను ప్రశ్నించాడు

రాజ్యాంగం ప్రకారం దేవుడ్ని నమ్మటానికి మీకెంత హక్కు ఉందో దేవుడ్ని నమ్మకపోవడానికి ఆయనకీ అంతే హక్కు ఉంది అని సమర్దించాడు

దేవుడికే లేని బాధ మధ్యలో ఈ స్వయం ప్రకటిత దేవుడి దళారులకు బీపీలు , అల్సర్లు వస్తున్నాయెందుకు ? అని ఘాటుగా పోస్ట్ పెట్టారు

ఇప్పటికే రాజమౌళి వ్యాఖ్యలతో ఆగ్రహం చెందిన హిందూ సంఘాలు నిరసనలు చేస్తున్నాయి

అగ్నికి ఆజ్యం తోడైనట్టు ఇప్పుడు రామ్ గోపాల్ వర్మ వివాదాస్పద పోస్ట్ పెట్టి హిందూ సంఘాలను మరింత రెచ్చగొట్టాడు

అదీ సంగతి

చూడాలి.. వర్మ గారి పోస్ట్ మీద సోషల్ మీడియా స్పందన ఏ విధంగా ఉంటుందో చూడాలి !