‘రంగా పక్కలో మురళి బళ్లెం’ – ఒక వార్త .. పెను సంచలనం !

సరిగ్గా దేవినేని మురళి హత్యకు కొద్దిరోజుల ముందు ఒక డైలీ న్యూస్ పేపర్ విజయవాడ మెయిన్ ఎడిషన్ లో ‘ రంగా పక్కలో మురళి బళ్ళెం ‘ పేరుతొ ఒక వార్తా కధనం పబ్లిష్ అయ్యింది

అప్పట్లో ఈ వార్త విజయవాడలోని ఇరు వర్గాల్లో సంచలనం సృష్టించింది

ఈ కధనం పట్ల దేవినేని వర్గం సంబరాలు చేసుకోగా వంగవీటి వర్గం ఆగ్రహం వ్యక్తం చేసింది

సదరు విలేకరి గత కొద్ది రోజులుగా విజయవాడలో జరుగుతున్న పరిణామాలను ఉటంకిస్తూ కధనం రాసారు

ఆ కధనంలో ప్రధానంగా విజయవాడలో వంగవీటి మోహన రంగా వర్గంపై దేవినేని మురళి ఏ విధంగా దూకుడుగా దూసుకెళ్తున్నాడో రాసాడు

సరే , ఆ కధనం గురించి చర్చించుకునే ముందు ఆనాటికి వాస్తవంగా విజయవాడలో ఉన్న పరిస్థితుల గురించి ఒకసారి గుర్తు చేసుకుందాం

1970 వ దశకంలో విజయవాడలో కమ్యూనిస్టుల ఏలుబడిలో ఉండేది ( ఏలుబడి అంటే నాయకత్వ పరంగా కానీ , క్యాడర్ పరంగా కానీ నిర్ణయాత్మక శక్తిగా ఉండేది )

లేబర్ యూనియన్లలో కమ్యూనిస్టులు కీలక పాత్ర పోషించేవాళ్ళు

బస్ స్టాండ్ దగ్గర ఉన్న విజయవాడ టాక్సీ వర్కర్స్ యూనియన్ కు కమ్యూనిస్ట్ నాయకుడు చలసాని వెంకట రత్నం లీడర్

ఇదే యూనియన్లో వంగవీటి రాధా ( మోహన రంగా అన్న ) కూడా చురుగ్గా ఉండేవాడు

తదుపరి కాలంలో నాయకత్వ పోటీలు వచ్చి 1972 లో చలసాని వెంకట రత్నం హత్య చేయబడి యూనియన్లు వంగవీటి రాధా ఏలుబడిలోకి వచ్చాయి

చలసాని వెంకట రత్నం హత్య కేసులో వంగవీటి రాధాతో సహా మరికొంత మందికి కింది కోర్ట్ యావజ్జీవ కారాగార శిక్ష విధించింది

కానీ హై కోర్ట్ ఈ కేసు కొట్టివేయడంతో రాధా బయటికి వచ్చాడు

1974 లో చలసాని వర్గం వంగవీటి రాధాను హత్య చేయడంతో ఆయన సోదరుడు వంగవీటి మోహన రంగా తెరమీదికి వచ్చాడు

రాధా స్థానాన్ని రంగా భర్తీ చేస్తున్నాడని తెల్సుకున్న ప్రత్యర్థులు రంగాను కూడా తుదముట్టించడానికి స్కెచ్ వేశారు

ఈ విషయం తెలుసుకున్న రాధా క్యాడర్ రంగాని బలవంతంగా అజ్ఞాతానికి పంపించారు

కొంతకాలం అజ్ఞాతంగా ఊటీలో గడిపిన రంగా అన్న ఆశయాలను సాధించేందుకు చావుకైనా వెనుకాడనని ధైర్యంగా విజయవాడ వచ్చేసారు

మెల్లిగా వంగవీటి మోహన రంగా కూడా విజయవాడలో కార్మిక నాయకుడిగా ఎదగడం మొదలుపెట్టాడు

ఒక దశలో దేవినేని వర్గం కూడా రంగాతో కలిసి పనిచేసింది

కార్మిక నాయకుడిగా ఎదిగిన రంగా విద్యార్థి నాయకుడిగా కూడా ఎదగటానికి అన్న UI పేరుతొ స్థాపించిన స్టూడెంట్ ఆర్గనైజేషన్ ను మరింత బలోపేతం చేసే దిశగా రంగంలోకి దిగాడు

సరిగ్గా ఇదే సమయంలో దేవినేని సోదరులు విడిపోయి సొంతంగా USO పేరుతొ వేరే స్టూడెంట్ ఆర్గనైజేషన్ పెట్టుకోవడంతో విజయవాడలో వంగవీటి , దేవినేని వర్గాలుగా విడిపోయారు

సరిగ్గా ఈ పరిస్థితుల్లో విజయవాడ లయోలా కాలేజీలో ప్రచారం చేస్తున్న దేవినేని గాంధీని ప్రత్యర్థులు హత్య చేసారు

ఈ హత్య కేసులో వంగవీటి మోహన రంగాతో పాటు మరికొంతమంది పైన పోలీసులు కేసులు పెట్టి అరెస్ట్ చేసారు

దేవినేని గాంధీ హత్య తర్వాత ఇరువర్గాలకు చెందిన కొంతమంది శాంతి సంఘాలు ఏర్పాటు చేసుకుని కొన్ని నిబంధనలు పెట్టుకున్నారు

ఆ నిబంధనల ప్రకారం వర్గ పోరాటాలకు విరామం ప్రకటించడం , ఎవరి సరిహద్దుల్లో వాళ్ళు కార్యకలాపాలు చేసుకోవడం ( గుణదల , కంకిపాడు ఏరియాలు దేవినేని నెహ్రు ప్రాంతాలుగా , విజయవాడ వంగవీటి ప్రాంతంగా హద్దులు నిర్ణయించుకున్నారు ) , ఏమన్నా సమస్యలుంటే శాంతి సంఘం ద్వారా పరిష్కరించుకోవాలని నిర్ణయించుకున్నారు

దరిమిలా వంగవీటి మోహన రంగా కాంగ్రెస్ పార్టీలో కార్పొరేటర్ గా , ఎమ్మెల్యేగా ఎదగగా , దేవినేని నెహ్రు టిడిపిలో ఎమ్మెల్యేగా ఎదిగాడు

క్రమంగా వర్గ పోరాటాలు కాస్తా రాజకీయ పోరాటాలుగా మారిపోయాయి
హత్యా రాజకీయాలు తగ్గు ముఖం పట్టి ఎవరి స్థాన బలం వారు పెంచుకుంటున్నారు

ఇలా 1988 వరకు చిన్నాచితకా గొడవలు మినహా దాదాపు ప్రశాంతంగానే నడిచింది అని చెప్పాలి

ఈ పరిస్థితుల్లో అకస్మాత్తుగా దేవినేని నెహ్రు తమ్ముడు మురళి రంగా వర్గం మీద దూకుడుగా దూసుకువస్తుండటంతో ఒక్కసారిగా విజయవాడ వాతారణం మారిపోయింది

మళ్ళీ పాత పగలు పడగలు విప్పాయి

దీనికి పరాకాష్ట గా చనిపోవడానికి కొద్ది రోజుల ముందు మురళి పెద్ద ఊరేగింపు తీసి రంగా ఇంటిముందు ఆగి మరీ నినాదాలు చేసాడు

రంగాకు చెందిన స్టూడెంట్ ఆర్గనైజేషన్ విద్యార్థులు మురళి భయానికి ఊళ్ళు విడిచిపెట్టి పోయారు

మురళి రంగా భార్య రత్నకుమారికి ఫోన్ చేసి రంగాని రోజులు లెక్కపెట్టుకోమని బెదిరించిన విషయం కూడా బయటికి వచ్చింది

అప్పుడు వచ్చింది పేపర్లో ‘ రంగా పక్కలో మురళి బళ్ళెం ‘ అనే వార్తా కధనం

ఈ వార్త పబ్లిష్ అయిన కొద్ది రోజులకే 1988 మార్చిలో దేవినేని మురళి లా పరీక్షలు రాయడానికి కారులో నెల్లూరు బయలుదేరాడు

అప్పటికే రంగాతో సహా ప్రత్యర్థులు ఎవరూ నగరంలో లేకపోవడంతో కీడు శంకించిన నెహ్రు మురళిని నెల్లూరు వెళ్లోద్దని ఆపటానికి ప్రయత్నం చేసాడు

ఆ రోజుల్లో ప్రత్యర్థులు నగరంలో లేకపొతే ఎవరికో స్పాట్ పెడుతున్నారని అర్ధం

అయినా మురళి పట్టించుకోకుండా కొంతమంది అనుచరులను తోడుగా తీసుకుని మెటాడోర్ వ్యాన్ లో నెల్లూరు వెళ్లి పరీక్షలు రాసాడు

తిరుగు ప్రయాణంలో విజయవాడ వస్తుండగా చిలకలూరి పేట దగ్గరలో మురళి హత్య చేయబడ్డాడు

(ఇదే సన్నివేశాన్ని రామ్ గోపాల్ వర్మ శివ సినిమాలో వాడుకున్నాడు)

దానితో హత్యా రాజకీయాలకు దూరంగా ఉన్న విజయవాడ ఒక్కసారిగా ఉలిక్కిపడింది

ఆ సమయంలో వంగవీటి మోహన రంగా ఢిల్లీలోని రామ్ మనోహర్ లోహియా ఆసుపత్రిలో ముక్కుకి శస్త్ర చికిత్స చేయించుకుంటున్నారు

పోలీసులు రంగాతో సహా మరికొంతమంది అనుచరులపై కేసులు పెట్టారు

అదే సంవత్సరం డిసెంబర్ 26 న విజయవాడలో నిరాహార దీక్షలో ఉండగా వంగవీటి మోహన రంగా హత్య చేయబడ్డారు !

(ఈ ఆర్టికల్ షేర్ చేయదల్చుకున్నవారు ఇక్కడ కనిపిస్తున్న వాట్సాప్ , ఫేస్ బుక్ మరియు ఇతర సోషల్ మీడియా ఐకాన్ల ద్వారా చేయొచ్చు )