జూబ్లీ హిల్స్ బై పోల్ లో కారు పల్టీ కొట్టడానికి కారణాలు ఏంటి ?

శివ సినిమాలో ఓ దృశ్యం ఉంటుంది

రఘువరన్ తో డీల్ సెటిల్ చేసుకోవడానికి గొల్లపూడి మారుతీరావు ఓ రహస్య ప్లేసులో కలుసుకుంటాడు

యాక్చ్యువల్ గా మాట్లాడుకుందామని పిలిపించి రఘువరన్ ని లేపేద్దామని గొల్లపూడి ప్లాన్

గొల్లపూడి చెప్పిన ప్లేసుకి రఘువరన్ తన మనుషులతో వస్తాడు
అప్పటికే గొల్లపూడి కూడా తన మనుషులతో వస్తాడు

అప్పుడు గొల్లపూడి అంటాడు ” చూసావా రఘువరన్ .. నేను పిలవగానే గుడ్డిగా నమ్మేసి ఎగేసుకుంటూ వచ్చావ్ ? నీ టైం దగ్గర పడింది.. వీడ్ని ఏసేయండ్రా” అని తన వెనకున్న రౌడీలకు చెప్తాడు

ఆశర్యంగా ఆ రౌడీలు గొల్లపూడి మీదే తుపాకులు గురిపెడతారు
గొల్లపూడి షాక్ అవుతాడు

తన దగ్గర జీతం తీసుకునే రౌడీలు తన మీదే తుపాకులు గురి పెట్టారేంటా అని తెల్ల ముఖం వేస్తాడు

అప్పుడు రఘువరన్ ముందుకొచ్చి ” రేయ్ గొల్లపూడీ.. రౌడీయిజంలో ఓవర్ కాన్ఫిడెన్స్ పనికిరాదురా ” అంటూ కత్తి తీసి కసుక్కున గొల్లపూడి గుండెలో గుచ్చుతాడు

గొల్లపూడి అబ్బా అనుకుంటూ కూలిపోతాడు

ఆగండాగండి

ఇదేంటి జూబ్లీ హిల్స్ బై పోల్ లో కారు పల్టీ కొట్టి హస్తం చేతిలోకి స్టీరింగ్ ఎలా వచ్చిందనేది విశ్లేషణ చేసుకుందాం అనిచెప్పి శివ సినిమా సన్నివేశం చెబుతున్నాడేంటి అనుకుంటున్నారా ?

శివ సినిమాలో రఘువరన్ చెప్పిన ఓవర్ కాన్ఫిడెన్స్ అనే డైలాగ్ అన్ని రంగాలకు వర్తిస్తుంది

ఈ ఓవర్ కాన్ఫిడెన్స్ వల్ల ఒక్కోసారి శత్రువు బలాన్ని , వ్యూహాన్ని తక్కువ అంచనా వేసి బొక్కబోర్లా పడతాం

జూబ్లీ హిల్స్ బై పోల్ లో బిఆర్ఎస్ పార్టీ ఓడిపోవడానికి మొదటి కారణం ఓవర్ కాన్ఫిడెన్స్
రెండో కారణం శత్రువు బలాన్ని తక్కువగా అంచనా వేయడం
మూడో కారణం సరైన వ్యూహాలు లేకుండా ప్రచారానికి వెళ్లడం

ఈ మూడు విషయాల్లో రేవంత్ జాగ్రత్త పడ్డాడు
కేటీఆర్ నిర్లక్ష్యం చేసాడు

జూబ్లీ హిల్స్ లో ఎలాగైనా గెలిచి తీరతామనే కేటీఆర్ ఓవర్ కాన్ఫిడెన్స్ వెనుక కొని కారణాలు ఉన్నాయి

జూబ్లీ హిల్స్ లో దివంగత మాగంటి గోపినాధ్ మూడుసార్లు ఎమ్మెల్యేగా ఎన్నికయ్యారు
ఆయన మరణంతో అయన భార్యకు టికెట్ ఇవ్వడంతో సహజంగా సానుభూతి ఓట్లు పడతాయని భావించారు

కాంగ్రెస్ పార్టీ అభ్యర్థి నవీన్ యాదవ్ ని రౌడీ గా ప్రొజెక్ట్ చేయడం వల్ల అతడి మీద నెగిటివ్ తో ఓట్లన్నీ తమకే పడతాయనే సింగిల్ పాయింట్ ఎజండాతో కేటీఆర్ , హరీష్ రావు , సునీతలతో సహా పార్టీ నాయకులంతా ప్రచారంలో రౌడీ నామం జపించారు

క్రిమినల్ నేరారోపణలు ఉన్నవాళ్లు , కేసుల్లో విచారణలు ఎదుర్కుంటున్నవారిని బోలెడుమందిని ఇప్పటికే చట్టసభలకు పంపిన చరిత్ర ఓటర్లకు ఉంది
కాబట్టి రౌడీ ప్రచారం పెద్దగా వర్కౌట్ కాలేదు

గెలిచే సీటే కదా అనుకున్నారో , రాజకీయ వైరాగ్యమో తెలీదు కానీ సునీతకు ఎర్రవల్లి ఫార్మ్ హౌస్ లో బి ఫార్మ్ , నలభై లక్షల చెక్కు ఇవ్వడం మినహా కేసీఆర్ జూబ్లీ హిల్స్ ప్రచారానికి రాలేదు

కాళేశ్వరం ప్రాజెక్టులో తాము అవినీతి చేయలేదని హరీష్ రావు చెప్పిన మాటలకన్నా పూర్తి అవినీతి చేసారని కవిత చెప్పిన మాటలు జనాల్లోకి బాగా వెళ్లాయి

ఏపీలో షర్మిల ప్రభావంతో జగన్ కు జరిగిన డ్యామేజే కవిత ప్రభావంతో కేటీఆర్ కు జరిగింది

సాక్ష్యత్తు కేసీఆర్ కూతురు కవిత తమ పార్టీలో అవినీతి జరిగిందని పదే పదే మీడియా సమావేశాల్లో చెప్పడం ఖచ్చితంగా బిఆర్ఎస్ పార్టీ మీద ప్రతికూల ప్రభావం చూపిస్తుంది

ఫ్యామిలీ గొడవలను నాలుగ్గోడల మధ్య పరిష్కరించుకోలేకపోవడం వల్ల ఏపీలో జగన్ కు జరిగిన డ్యామేజీ చూసి కూడా కవిత విషయంలో నిర్లక్ష్యం చేశారనిపిస్తుంది

బిఆర్ఎస్ అవినీతి గురించి కాంగ్రెస్ నాయకులు అవినీతి ఆరోపణలు చేస్తే అవి కొంతవరకు రాజకీయ ఆరోపణలుగానే మిగిలిపోయే అవకాశం ఉంది

కానీ కేసీఆర్ కూతురు , కేటీఆర్ చెల్లెలు అయిన కవిత కాళేశ్వరం ప్రాజెక్టులో తమ పార్టీ అవినీతికి పాల్పడిందని చేసిన ఆరోపణలకు విలువ లేకుండా ఎలా ఉంటుంది ?

ఇంత చిన్న లాజిక్ అంత పెద్ద వ్యూహకర్త కేసీఆర్ ఎలా మిస్ అయ్యారు ?

ఇప్పుడు శత్రువు రేవంత్ వైపు వ్యూహం చూద్దాం

జూబ్లీ హిల్స్ బై పోల్ లో కాంగ్రెస్ అభ్యర్థి గెలిస్తే సంఖ్యా పరంగా పార్టీకి పెద్దగా కలిసొచ్చేది ఏమీ లేదు కానీ ఈక్వేషన్స్ పరంగా , వ్యక్తిగతంగా రేవంత్ రెడ్డికి ఈ గెలుపు చాలా అవసరం

ఢిల్లీ అధిష్టానం దగ్గర తన పరపతిని నిలుపుకోవాలన్నా , రాష్ట్రంలో ముఖ్యమంత్రి పదవి కోసం కాచుకూర్చున్న సీనియర్లను కట్టడి చేయాలన్నా జూబ్లీ హిల్స్ కాంగ్రెస్ అభ్యర్థి గెలవడం రేవంత్ రెడ్డికి చాలా అవసరం

అందుకే ఈ ఎన్నికను రేవంత్ రెడ్డి ఆషామాషీగా తీసుకోలేదు

ఎన్నికల నోటిఫికేషన్ రావడానికి మూడు నెలల ముందే నలుగురు క్యాబినెట్ మంత్రులను , ఎమ్మెల్యేలను , ఇతర నాయకులను జూబ్లీ హిల్స్ లో మోహరించాడు

తమ గెలుపుకి అవసరమైన ఏ ఒక్క ఈక్వేషన్ని నిర్లక్ష్యం చేయలేదు

ఆఖరికి జూబ్లీ హిల్స్ నియోజక వర్గ పరిధిలో ఉన్న 11 శాతం ముస్లిం ఓటర్లను కూడా నిర్లక్ష్యం చేయలేదు

బై పోల్ ముందు అప్పటికప్పుడు అజారుద్దీన్ కు మంత్రి పదవి ఇచ్చాడు

ఇలా జూబ్లీ హిల్స్ లో గెలుపుకు అవసరమైన ఏ ఒక్క చిన్న అంశాన్ని కూడా రేవంత్ అశ్రద్ధ చేయలేదు

రేవంత్ వ్యూహం ఫలించి కాంగ్రెస్ అభ్యర్థి నవీన్ యాదవ్ 24 వేల పై చిలుకు ఓట్ల తేడాతో గెలిచారు

అందుకే ఒక్కోసారి యుద్ధంలో గెలవడానికి బలం కన్నా వ్యూహం ప్రధాన పాత్ర పోషిస్తుంది అనేది !