సినిమాలో ‘సినిమా’ చూపించిన కాంత !

మనం ఏదైనా సినిమా చూడాలనుకున్నప్పుడు అది లవ్ స్టోరీనా ,ఫ్యామిలీ మూవీనా , లేకపోతే కామెడీ , హర్రర్ స్టోరీ మూవీనా అనేది ముందు తెలుసుకుంటాం

ఎందుకంటే ఒక్కొక్కళ్ళకి ఒక్కో జానర్ మీద ఇష్టాలు , ఆసక్తి ఉంటాయి
దానికి తగ్గట్టుగా సినిమాలను ఎంచుకుంటాం

పై జానర్లు ఏమీ కాకుండా సినిమా నేపథ్యంతోనే వచ్చే సినిమాలు అరుదుగా వస్తుంటాయి

గతంలో వచ్చిన మహానటి మూవీ స్టోరీ అంతా సినిమా నేపథ్యంలోనే సాగుతుంది

మళ్ళీ ఇప్పుడు వచ్చిన కాంత మూవీ కూడా సినిమా నేపథ్యంలో తీసిన సినిమానే

కాకపోతే సినిమాలకు సంబంధించి తెర వెనుక నిజ జీవితంలో దర్శకుడు , హీరో ల మధ్య సంబంధాలు ఎలా ఉంటాయో ముచ్చటిస్తూనే కొంచెం సస్పెన్సు క్రైమ్ సీన్స్ మిక్స్ చేసారు

అదే కాంత సినిమాకి అదనపు ఆకర్షణ

కాంత కధేంటి ?

కాంత కథ 1950 కాలం నాటి సినిమాల నేపథ్యంలో మొదలౌతుంది

అయ్య (సముద్రఖని ) పేరున్న దర్శకుడు . ఈయన తన తల్లి జీవితం ఆధారంగా శాంత అనే సినిమా తీద్దామని నిర్ణయించుకుంటాడు

ఈ సినిమా కోసం తన శిష్యుడైన నట చక్రవర్తి టీకే మహదేవన్ (దుల్కర్ సల్మాన్ ) హీరోగా , కుమారి ( భాగ్యశ్రీ బొర్షే ) హీరోయిన్ గా శాంత మూవీని మొదలుపెడతాడు

అయితే అనుకోకుండా సినిమా మధ్యలోనే ఆగిపోతుంది

ఎనిమిదేళ్ల తర్వాత అయ్య అదే సినిమాని తిరిగి మొదలుపెడతాడు

కాకపోతే సినిమా పేరు శాంత బదులు కాంత అని మార్చి తాను చెప్పిన షరతులకు ఒప్పుకుని తీస్తేనే నటిస్తానని కండిషన్ పెడతాడు హీరో మహదేవన్

తల్లి కోసం అయ్య ఆ షరతులకు ఒప్పుకుని సినిమా మొదలుపెడతాడు

సినిమా అయితే మొదలైంది కానీ దర్శకుడుకి , హీరోకి క్షణం పడేది కాదు
ఈ ఇద్దరి ఈగోల మధ్య హీరోయిన్ నలిగిపోతూ ఉంటుంది

ఇలాంటి దశలో ఓ హత్య జరుగుతుంది
అక్కడే కాంత కథ కొత్త మలుపు తీసుకుంటుంది

ఈ హత్య కేసును పరిశోధించడానికి ఇన్స్పెక్టర్ దేవరాజ్ ( దగ్గుబాటి రానా ) రంగంలోకి దిగుతాడు

ఇంతకీ హత్యకి గురైంది ఎవరు ?
హంతకుడ్ని ఇన్స్పెక్టర్ దేవరాజ్ కనిపెడతాడా ?
హీరోకి , దర్శకుడికి మధ్య జరుగుతున్న గొడవలు పరిష్కారం అవుతాయా ? అనేది మిగతా కధలో తెలుస్తుంది

సినిమా ఎలా ఉంది ?

నిజానికి ఈ సినిమా కథను 1950 కి ముందు తమిళనాడులో జరిగిన వాస్తవ సంఘటనల ఆధారంగా రాసుకున్నారు

అప్పట్లో తమిళ సూపర్ స్టార్ గా వెలిగిన త్యాగరాజ మహావతార్ కి , ఒక దర్శకుడికి పొసగక కేసులు , జైలు దాకా వెళ్ళింది వ్యవహారం

సినిమా నిర్మాణం వెనుక యూనిట్ మధ్య సఖ్యత ఏ విధంగా ఉంటుంది ? దర్శకుడికి , హీరోకి మధ్య వచ్చే ఈగో ప్రాబ్లమ్స్ వల్ల నిర్మాతలు ఏ విధంగా నష్టపోతారు అన్న కోణంలో కాంత కథ రాసుకున్నారు

అయితే పూర్తిగా సినిమాల గురించే చూపిస్తే ప్రేక్షకులకు ఎక్కకపోవచ్చన్న ముందస్తు ఆలోచనతో తెలివిగా కొద్దిగా క్రైమ్ సస్పెన్సు స్టోరీని మిక్స్ చేసారు

నిజానికి కాంత సినిమాకి ఈ ఫార్ములా వర్కౌట్ అయ్యింది

హత్య కేసును పరిశోధించడానికి దగ్గుబాటి రానా రావడంతో ప్రేక్షకులకు క్యూరియాసిటీ కలిగిస్తుంది

అయితే రానా నేరపరిశోధన వేగంగా సాగకుండా నిదానంగా నడిచినట్టు అనిపిస్తుంది

సినిమా ఫస్ట్ ఆఫ్ అంతా 1950 ల నాటి సినిమాల కాలాన్ని తెర మీద జాగ్రత్తగా ఆవిష్కరించారు

అప్పటి నేటివిటీని కళ్ళకు కట్టినట్టు చూపించడంలో దర్శకుడు సక్సెస్ అయ్యాడు

కాకపోతే హత్య కేసు పరిశోధన నిమిత్తం దగ్గుబాటి రానా వచ్చేవరకు ప్రథమార్థం రొటీన్ గా సాగిపోతుంది

ద్వితీయార్థం మాత్రం అపరాధ పరిశోధన నవల చదువుతున్నట్టు అనిపిస్తుంది

అన్నట్టు ఈ సినిమాలో అయ్య మొదలుపెట్టిన సినిమా మధ్యలో ఆగిపోయి తిరిగి మొదలైనట్టు కాంత సినిమా కూడా మధ్యలో కొన్నాళ్ళు ఆగిపోయి తిరిగి షూటింగ్ కి వెళ్ళింది

ఎవరెలా చేసారు ?

మలయాళ నటుడు ముమ్మట్టిని తెలుగు ప్రేక్షకులు కూడా ఎప్పుడో ఓన్ చేసుకున్నారు
ఈరోజుకి ముమ్మట్టి సినిమాలకు తెలుగు నాట ఆదరణ ఉంది

దుల్కర్ సల్మాన్ కూడా తండ్రి బాటలో నటిస్తూ తెలుగు ప్రేక్షకులకు దగ్గరయ్యారు

ముఖ్యంగా సీతారామం , లక్కీ భాస్కర్ వంటి సినిమాల్లో చక్కటి నటన ప్రదర్శించి నటుడిగా తెలుగునాట కూడా మరోమెట్టు ఎక్కాడు

కాంత సినిమాలో కూడా దుల్కర్ సల్మాన్ తన గత సినిమాలకు ఏ మాత్రం తగ్గకుండా చక్కటి పెర్ఫార్మన్స్ చూపించాడు

క్యారక్టర్ ఆర్టిస్టులలో చక్కటి నటన కనపరచడంలో సముద్ర ఖని ఎప్పుడూ ముందుంటాడు
కాంత లో కూడా సముద్ర ఖని నటన బావుంది

కధానాయిక భాగ్యశ్రీ చక్కటి లుక్స్ తో దుల్కర్ పక్కన అందంగా కనిపిస్తుంది

ద్వితీయార్థంలో ఎంటర్ అయిన దగ్గుబాటి రానా తనదైన స్టైల్ లో ఇన్స్పెక్టర్ పాత్రను రక్తి కట్టించాడు

ఇక సాంకేతికత గురించి చెప్పుకోవాలంటే సినిమా 1950 ల కాలం నాటిది కాబట్టి అప్పటి నేటివిటీకి కనెక్ట్ అయ్యే విధంగా చూపించాల్సి ఉంటుంది
సినిమాటోగ్రఫీ లో డానీ సాంచెజ్ లోపెజ్ విజయం సాధించాడు
విజువల్స్ పరంగా ప్రేక్షకులను అప్పటి కాలానికి తీసుకెళ్లాడు

బిజోయ్ నేపధ్య సంగీతం బావుంది

ఇక దర్శకుడి గురించి చెప్పాలంటే కాంత లో కేవలం సినిమా విషయాలనే చూపించకుండా క్రైమ్ ను కూడా మిక్స్ చేసి ప్రేక్షకులకు ఇంట్రెస్ట్ కలిగించే విధంగా స్క్రీన్ ప్రెజెన్స్ చేసాడు
ఇక్కడే అతడి పనితనం కనిపిస్తుంది

అన్నట్టు ఈ సినిమాని మలయాళ నటుడు దుల్కర్ , తెలుగు నటుడు దగ్గుబాటి రానా సంయుక్తంగా తమిళ్ లో నిర్మించి విడుదల చేసారు

తెలుగు అనువాదం పూర్తి చేసుకున్న కాంత రెండు తెలుగు రాష్ట్రాల్లో కూడా రిలీజ్ అయ్యింది

నటీనటులు : దుల్కర్ సల్మాన్ , సముద్ర ఖని , దగ్గుబాటి రానా , భాగ్యశ్రీ తదితరులు
నిర్మాత : దగ్గుబాటి రానా , దుల్కర్ సల్మాన్ , ప్రశాంత్ పొట్లూరి , జోమ్ వర్గీస్
రచన , దర్శకత్వం : సెల్వమణి సెల్వరాజ్
విడుదల : నవంబర్ 14 , 2025
రేటింగ్ : 3 / 5