ప్రేమ కథను వినూత్నంగా తెరకెక్కించిన సినిమా గర్ల్ ఫ్రెండ్ !

గతంలో లవ్ స్టోరీల ఇతివృత్తంగా చాలా సినిమాలు వచ్చాయి

హీరో , హీరోయిన్లు ప్రేమించుకోవడం , కులాలు వేరవడం , హీరో తండ్రి ఒప్పుకోకపోవడం , ఇలా అనేకానేక గొడవల తర్వాత క్లైమాక్సులో హీరో , హీరోయిన్లు పెళ్లిచేసుకోవడమో , చచ్చిపోవడమో జరిగేది

ఈ లోపు నాలుగు పాటలు , పది కన్నీళ్లు , ఇరవై బరువైన ఎమోషన్లు ఉంటాయి

దాదాపు సినిమా ప్రేమ కధలన్నీ ఇలానే ఉంటాయని తెలుగు ప్రేక్షకుడు ఎప్పుడో ఫిక్స్ అయిపోయాడు

ప్రేమ కధల్లో క్లైమాక్సులో శుభం కార్డు వేయాలా , ట్రాజెడీ ముగింపు ఇవ్వాలా అనేది దర్శకుడి యుక్తాయుక్త విచచక్షణ బట్టిన్ను,ప్రేక్షకుడి ప్రాప్తం బట్టినూ ఉండును

అందుకే గర్ల్ ఫ్రెండ్ చిత్ర దర్శకుడు రాహుల్ రవీంద్రన్ రొటీన్ రోడ్డ కొట్టుడు ఫార్ములా జోలికి పోకుండా హీరోయిన్ అంటే కేవలం హీరో పక్కన గెంతులు వేయడం వరకే పరిమితం కాదని , ఆమెకూ సొంత వ్యక్తిత్వం ఉంటుందని , ప్రేమలో పడిన మధ్యతరగతి అమ్మాయిలకు మనోభావాలు ఉంటాయని , ప్రేమించిన మగడి నుంచి తను కూడా అటువంటి గౌరవ మర్యాదలు ఆశిస్తుందని , ఇలా కొన్ని పాయింట్లు పకడ్బందీగా రాసుకుని అల్లు అరవింద్ ని కలిసి ఈ కథ సినిమా తీసి ఆహా ఓటిటి లో రిలీజ్ చేస్తే ఎలా ఉంటుందని అడిగాడు

కథ విన్న అల్లు అరవింద్ లోని నిర్మాత మేలుకున్నాడు

ఇది ఖచ్చితంగా మహిళలకు కనెక్ట్ అయ్యే స్టోరీ

హీరోయిన్ అంటే ఐటెం సాంగులకో , హీరో పక్కన గెంతులు వేయడానికో పరిమితం చేస్తున్న రొటీన్ సినిమాల నేపథ్యంలో ఒక మధ్య తరగతి అమ్మాయి అంతర్గత సంఘర్షణను ఫీల్ చెడకుండా రాహుల్ కథ రాసుకున్న విధానం అల్లు అరవింద్ కి నచ్చింది

వెంటనే ఆహా అనేసి ఓటిటి కాదు థియేటర్ రిలీజ్ బొమ్మ ఇది అని కొబ్బరికాయ కొట్టేసారు
అలా గర్ల్ ఫ్రెండ్ సినిమా తెరకెక్కింది

అన్నట్టు ఈ సినిమా రిలీజ్ సందర్భంలోనే తాళి గురించి మాట్లాడి దర్శకుడు రాహుల్ రవీంద్రన్ , పీరియడ్స్ గురించి మాట్లాడి రష్మిక వార్తల్లో నిలిచారు ( సినిమా ప్రమోషన్లో ఇదీ భాగం కాదు కదా ? )

ఇంతకీ గర్ల్ ఫ్రెండ్ స్టోరీ ఏంటి ?

మధ్యతరగతి నేపథ్యంలో తల్లి లేని తండ్రి చాటు బిడ్డ భుమాదేవి ( రష్మిక) పీజీ చదువుల కోసం హైదరాబాద్ సిటీ వచ్చి హాస్టల్లో ఉంటూ చదువుకుంటుంది

అప్పటిదాకా ఆమెకు చదువులు తప్ప ప్రేమా దోమలు తెలియవు

అదే కాలేజీలో చదువుకుంటున్న విక్రమ్ ( దీక్షిత్ శెట్టి ) భూమాని ప్రేమిస్తాడు

అలా ఇద్దరి మధ్య మొదలైన ప్రేమ కొనసాగుతుండగానే ప్రియుడి మేల్ ఈగో డామినేటింగ్ మనస్తత్వంతో అంతర్గత సంఘర్షణను ఎదుర్కొంటుంది భూమా దేవి

విక్రమ్ ప్రేమలో భూమా దేవి ఎటువంటి అనుభవాలను ఫేస్ చేసింది ?

ఈ క్రమంలో తండ్రి రావు రమేష్ , ప్రియుడు విక్రమ్ ల మధ్య మాటల వల్ల ఎలా నలిగిపోయింది ?

ఒక పక్కన సంఘర్షణ పడుతూనే తన ప్రేమకు ఎలాంటి ముగింపు నిర్ణయం తీసుకున్నది అనేదే మిగిలిన కథ ?

ఎవరెలా చేసారు ?

గర్ల్ ఫ్రెండ్ సినిమాలో మనకు రష్మిక కనపడదు.. మొత్తం భుమాదేవినే కనిపిస్తుంది

రష్మికను నటిగా మరో మెట్టు పైకి చేర్చిన సినిమా గర్ల్ ఫ్రెండ్
రష్మిక ఇంత గొప్పగా నటించడం వెనుక ఒక కారణం కూడా ఉంది

కథ వినగానే ఆమె భుమాదేవి పాత్రకు కనెక్ట్ అయిపోయింది
తాను ఎదురుచూసిన పాత్ర ఇన్నేళ్లకు దొరికిందని మురిసిపోయి వెంటనే ఓకే చేసేసింది

ఎస్ .. హీరోయిన్ గా రష్మికను ఎంచుకున్న రాహుల్ ఛాయిస్ కూడా కరెక్టే
ఆమె మనసు పెట్టి చేసి కధకు ప్రాణం పోసింది

ఓటిటి లో సినిమా చూద్దాం రమ్మని ప్రియుడు ఫోన్ చేసి పిలిచినప్పుడు మంచం దిగి బయలుదేరిన భూమాదేవి వెనక్కి వచ్చి చున్నీ కప్పుకుని బయలుదేరడం ద్వారా ఆమె వ్యక్తిత్వాన్ని ప్రెజెంట్ చేసిన తీరు బావుంది

విక్రమ్ పాత్ర పోషించిన దీక్షిత్ శెట్టి కూడా మల్టీ షేడ్స్ లో చేసి మెప్పించారు

ఇక రావు రమేష్ గురించి కొత్తగా చెప్పేది ఏమీ లేదు
తండ్రి పాత్రల్లో అతడిది కొట్టిన పిండి

రోహిణి కనిపించింది ఒకేఒక్క సీన్ లో అయినా హావభావాలతో తనదైన మార్క్ నటన చూపించింది

సినిమా ఎలా ఉంది ?

నిజానికి దర్శకుడు రాహుల్ రవీంద్రన్ రాసుకున్న గర్ల్ ఫ్రెండ్ స్టోరీ డిబేటబుల్ సబ్జెక్టు
ఈ సబ్జెక్టు ను సందేశంలా చెప్తే జనాలకు ఎక్కదు

పోనీ స్త్రీ వాదాన్ని డామినేటింగ్ గా ప్రెజెంట్ చేస్తే మగ ఆడియన్స్ కనెక్ట్ కారేమో అన్న అనుమానం ఉంది

అందుకే తెలివిగా కధలో భాగంగా తాను చెప్పాలనుకున్న మెసేజీని సినిమాలో చూపించాడు

పనిలోపనిగా దర్శకుడు కన్క్లూజన్ కి రాకుండా మీరే తేల్చుకోండి అని చర్చను జనాలమీదకు తోలి సినిమా చూసాడు

చెప్పాలనుకున్న విషయాన్ని ఎలాంటి కాంట్రావర్సీలకు పోకుండా సినిమాటిక్ గా చెప్పడంలో దర్శకుడు సక్సెస్ అయ్యాడు

అందుకే సినిమాకి ప్రియురాలు అనే టైటిల్ పెట్టకుండా గర్ల్ ఫ్రండ్ అనే టైటిల్ పెట్టినట్టున్నాడు

హేషమ్ అబ్దుల్ వహద్ అందించిన పాటలు బావున్నాయి
ప్రశాంత్ విహారి కూడా పాటలకు తగ్గ సంగీతం అందించారు
కృష్ణన్ వసంత్ సినిమాటోగ్రఫీ కూడా బావుంది

అను ఇమ్మాన్యుయేల్ కూడా ఉంది కానీ ఎందుకుందో తెలీదు

తీసుకున్న ఇతివృత్తం ప్రేమకు సంబంధించింది కాబట్టి ఎమోషన్లు , నాటకీయత , బరువైన డైలాగులు జొప్పించాలి కాబట్టి అక్కడక్కడా కధనం కొంత నత్తనడక నడుస్తుంది.. తప్పదు

కధనంలో వేగం ఆశించే నేటి తరం యూతు ప్రేక్షకులకు మాత్రం అప్పుడప్పుడు కొద్దిగా బోర్ అనిపిస్తుంది

ఓవరాల్ గా ఈ గర్ల్ ఫ్రెండ్ భూమాదేవికి మహిళా ప్రేక్షకులు కనెక్ట్ అవుతారు
తమ గర్ల్ ఫ్రెండ్ రష్మిక నటన చూసి యువ ప్రేక్షకులు పూర్తిగా కనెక్ట్ అవుతారు!

నటీనటులు : రష్మిక , దీక్షిత్ శెట్టి , రావు రమేష్ , రోహిణి , రాహుల్ రవీంద్రన్
నిర్మాణం : గీతా ఆర్ట్స్ సమర్పణ , ధీరజ్ మొగిలినేని , విద్య కొప్పినీడి
విడుదల : నవంబర్ 7 , 2025
రేటింగ్ : 3 / 5