మిడ్ నైట్ మర్డర్స్ సస్పెన్స్ క్రైమ్ థ్రిల్లర్ మూవీ రివ్యూ

2020 లో అంజామ్ పథిర అనే మలయాళ సస్పెన్స్ క్రైమ్ థ్రిల్లర్ మూవీ థియేటర్లలో రిలీజ్ అయి బాక్సాఫీస్ కలెక్షన్లు రాబట్టుకుంది . ఈ సినిమా భారీ బడ్జెట్ తో తీసారా ? అంటే అదీ లేదు . సింపుల్ బడ్జెట్ తోనే సినిమాని పూర్తి చేసి థియేటర్లలో రిలీజ్ చేసారు . అయినా పెట్టిన బడ్జెట్ కి రెండింతలు లాభాలు సంపాదించిపెట్టింది . అలా అని ఈ సినిమాలో భారీ తారాగణం కూడా లేరు . అంతా అప్పుడప్పుడే మలయాళంలో ఎదుగుతున్న నటులు . అయినా సినిమా బాగా ఆడింది . ఎందువలన అంటే ? సినిమా టైటిల్ చూడగానే అది ఏ జానర్ మూవీనో చాలామందికి అర్ధమయ్యే ఉంటుంది . క్రైమ్ థ్రిల్లర్ మూవీలు తీయడంలో మలయాళ దర్శకుల టాలెంట్ అందరికీ తెలిసిందే . టైట్ స్క్రీన్ ప్లే మాత్రమే ఈ సినిమా విజయ రహస్యం .

అందుకే ఇదే సినిమాని మిడ్ నైట్ మర్డర్స్ పేరుతో తెలుగులోకి డబ్ చేసి ఆహా ఓటిటి లో రిలీజ్ చేసారు . మిడ్ నైట్ మర్డర్స్ అనే టైటిల్ చూడగానే ఇదేదో సీరియల్ మర్డర్స్ స్టోరీ అని మనకు అర్ధమౌతుంది . ఎస్ .. స్టోరీ అదే .. ఇంతకుముందు చాలా సినిమాల్లో సీరియల్ మర్డర్స్ కధలు చాలా చూసాం . ఇప్పుడు ఈ సినిమాలో కూడా అవే చూస్తాం . అయితే వాటికీ , ఈ సినిమాకి తేడా ఏంటి ? అంటే పట్టుసడలని కథనమే తేడా .. ఈ మూవీలో సినిమా మొదలైనదగ్గర్నుంచి క్లైమాక్స్ వరకు క్రైమ్ థ్రిల్లర్ జానర్ కాన్సెప్ట్ యొక్క పట్టు సడలకుండా ఒకే టెంపో తో చివరివరకు నడిపించిన విధానం ప్రేక్షకులని కట్టిపడేస్తుంది . మధ్యలో వాన పాటలు , వెకిలి కామెడీ పెట్టి మన కాన్సంట్రేషన్ ను డైవర్ట్ చేయకుండా సీరియస్ మోడ్ లో చివరివరకు ఉత్కంఠతగా నడపటంతో అపరాధపరిశోధన కథతో పాటు మనం కూడా ప్రయాణిస్తాం . అసలే మిడ్ నైట్ మర్డర్స్ .. దానికి సైకో కిల్లర్ తోడైతే కధనంలో ఉండే కిక్కే వేరు .

ఇప్పుడు ఈ మిడ్ నైట్ మర్డర్స్ కేసేంటో చూద్దాం .

కధేంటంటే ?

సినిమా ప్రారంభమే సీరియల్ కిల్లర్ ని ఒక సైక్రియాట్రిస్టు ఇంటర్వ్యూ చేయడంతో మొదలౌతుంది . పది మర్దర్లు చేసి ఉరిశిక్ష పడిన ఫంక్ రవిని.. అన్వర్ ( కుంచకో బోబన్ ) అనే సైక్రియాట్రిస్టు జైల్లో ఇంటర్వ్యూ చేస్తాడు . ప్రతి నేరం వెనుక నేరస్తుడ్ని ప్రభావితం చేసిన కొన్ని పరిస్థితులు ఉంటాయని అన్వర్ నమ్ముతాడు . ఆ పరిస్థితుల ప్రభావంతోనే కొందరు సైకోలుగా మారి నేరాలు చేస్తారనేది అతడి థీసిస్ . అందుకే పది మర్దర్లు చేసిన ఫంక్ రవి పెరిగిన వాతావరణం గురించి అడుగుతాడు . కానీ అతడు చెప్పిన కారణం విచిత్రంగా ఉంటుంది . చిన్నప్పుడు చికెన్ షాపులో పనిచేయడం వల్ల కోళ్లను చంపడం , ముక్కలు కొట్టడం వంటి పనులు చేయడంతో అతడిలో సైకలాజికల్ డిజార్డర్ మొదలౌతుంది . కోళ్లను అలా చంపడంలోనే థ్రిల్ ఫీల్ అవుతుంటాడు . పెరిగి పెద్దయ్యాక ఆ డిజార్డర్ మనుషుల్ని చంపేదాకా వెళ్తుంది .

కట్ చేస్తే ,

సైక్రియాట్రిస్టు అన్వర్ కి పోలీస్ డిపార్ట్మెంట్లో క్రిమినాలజిస్ట్ గా చేరి సైకో కేసులను పరిశోధించాలని కోరిక . అందుకే ఎసిపి అనిల్ ను కలిసి తన కోరికను చెప్తాడు . కానీ ప్రస్తుతానికి డిపార్ట్మెంట్ సిబ్బంది ఉన్నారు కాబట్టి అఫీషియల్ గా తానేమీ చేయలేనని , కాకపోతే అనఫీషియల్ గా అతడి హెల్ప్ తీసుకుంటానని చెప్తాడు .

అయితే ఇదే సమయంలో పోలీస్ శాఖలో డీఎస్పీగా పనిచేస్తున్న అభిమన్యు కౌశిక్ ను కళ్ళు , గుండె పీకేసి ఎవరో గుర్తుతెలియని కిల్లర్ దారుణ హత్య చేయడంతో ఏసిపి అనిల్ సైక్రియాట్రిస్టు అన్వర్ ను పిలిపించి సలహా అడుగుతాడు . ఈ రకమైన మర్డర్ చేసాడంటే కిల్లర్ ఖచ్చితంగా సైకో అయ్యుంటాడని అన్వర్ అభిప్రాయపడతాడు . ఒకపక్క పోలీస్ ఇన్వెస్టిగేషన్ కొనసాగుతుండగానే మరోపక్క ఇంకో ఇద్దరు పోలీస్ ఆఫీసర్లు కిడ్నాప్ కావడం , మరుసటి రోజు కళ్ళు , గుండె పీకేసి డెడ్ బాడీలను వేరు వేరు చోట్ల పడేయడంతో పోలీస్ డిపార్ట్మెంట్ అలర్ట్ అవుతుంది . కిల్లర్ టార్గెట్ పోలీస్ అధికారులు కాబట్టి అందరూ జాగ్రత్తగా ఉండాలని అన్వర్ పోలీస్ డిపార్ట్మెంట్ కి సూచనలు చేస్తాడు .

కిల్లర్ ను పట్టుకోవడానికి పోలీస్ అధికారులు ఇన్వెస్టిగేషన్ చేస్తుండగానే అన్వర్ కూడా తనదైన సైకాలజీ నాలెడ్జ్ తో ఇన్వెస్టిగేషన్ మొదలుపెడతాడు . కిల్లర్ ఉట్టి సైకో మాత్రమే కాదు .. చాలా తెలివైనవాడు కూడా అని అన్వర్ భావిస్తాడు . ఎందుకంటే అతడు ముగ్గురు పోలీస్ ఆఫీసర్లను హత్య చేసినా వేలి ముద్రలు కానీ ,ఇతర ఆధారాలు కానీ దొరక్కుండా జాగ్రత్త పడ్డాడు . సిసి కెమెరాలు రికార్డ్ చేయకుండా హ్యాక్ చేయడంతో చిన్న క్లూ కూడా దొరకదు . ఈ పరిస్థితుల్లో సైబర్ నిపుణుడైన ఒక వ్యక్తి సాయంతో అన్వర్ ఇన్వెస్టిగేషన్ మొదలుపెడతాడు . అతడి ఇన్వెస్టిగేషన్ కిల్లర్ తాను మర్డర్ చేసిన ప్రతి పోలీస్ ఆఫీసర్ డెడ్ బాడీ పక్కన కళ్ళకు గంతలు లేని న్యాయదేవత బొమ్మ ఉంచుతాడు . ఆ బొమ్మ ఆధారంగా అన్వర్ ఇన్వెస్టిగేషన్ మొదలుపెట్టడంతో కొన్ని ఆశ్చర్యకరమైన విషయాలు తెలుస్తాయి .

ఇన్వెస్టిగేషన్ లో అన్వర్ ఏం తెలుసుకుంటాడు ? కిల్లర్ పోలీస్ అధికారులనే టార్గెట్ చేసి మర్దర్లు చేయడం వెనుక అసలు కారణాలు ఏంటి ? అసలు కిల్లర్ ఎవరు ? అనేది మిగిలిన కధలో తెలుస్తుంది .

ఎలా ఉంది ?

సీరియల్ మర్దర్ల కథలతో గతంలో చాలా సినిమాలు వచ్చాయి . ఆ జాబితాలో మిడ్ నైట్ మర్డర్స్ కథ కూడా చేరుతుంది . మరి ఈ సినిమా ప్రత్యేకత ఏంటి ? కట్టిపడేసే కథనమే ఈ సినిమా ప్రత్యేకత . ఎంచుకున్న కథ పాతదే అయినా దర్శకుడు తెరకెక్కించిన విధానం మాత్రం కొత్తదే . ఊరికే కధకు ప్లాట్ దొరికిందని దర్శకుడు సినిమా మొదలుపెటినట్టు లేదు. సైకో హత్యల నేపథ్యంలో కొంత స్టడీ చేసి సినిమాలో ఆ సన్నివేశాలు వాడుకున్నట్టున్నాడు .

సైక్రియాట్రిస్టు అన్వర్ ఓ క్లాసులో తన స్టూడెంట్స్ కి సైకాలజీ మీద లైసెన్స్ చెప్తూ , బెంజిమన్ లూయిస్ అనే సైకాలజీ డాక్టర్ రాసిన పుస్తకం ఖచ్చితంగా కొనుక్కుని అయినా సరే చదవమని తన స్టూడెంట్స్ కి చెప్తాడు . పుట్టి పెరిగిన వాతావరణం , చుట్టూ ఉన్న పరిస్థితులు మాములు మనిషిని కూడా నేరస్తుడిగా ఎలా మారుస్తాయో ఆ డాక్టర్ వివరంగా ఒక బుక్ రాసాడని చెప్తూ , తాను కూడా ఎన్నో విషయాలు ఆ బుక్ చదివే తెలుసుకున్నానని చెప్తాడు . కానీ క్లైమాక్సులో బెంజిమన్ లూయిస్ బుక్ కి , కిల్లర్ కి ఉన్న కనెక్షన్ చెప్పి దర్శకుడు భలే ట్విస్ట్ ఇస్తాడు .

నిజానికి ఫస్టాఫ్ లో షో రన్ అవుతుంది కానీ అసలు కథలోకి రాదు . పోలీస్ ఆఫీసర్లు మర్డర్ అవుతుంటారు .. పోలీసులు ఇన్వెస్టిగేషన్ చేస్తుంటారు .. సమాంతరంగా అన్వర్ ఇన్వెస్టిగేషన్ చేస్తుంటాడు .. దీంతో అసలు కిల్లర్ ఎవరు అనేది రివీల్ కాదు కానీ స్టోరీ సాగతీత సన్నివేశాలు కొన్ని తగులుకుంటాయి . గంజా బ్యాచ్ , సైకో సైమన్ సన్నివేశాలు సైకాలజీ క్లాసులో భాగంగా ఇరికించినట్టున్నారు .

ఇక సెకండాఫ్ లోకి వచ్చిన తర్వాతే కధనంలో వేగం పెరుగుతుంది . న్యాయదేవత విగ్రహాలు తయారుచేసిన వ్యక్తి ద్వారా కూపీ లాగడంతో అసలు స్టోరీలోకి వెళ్తాము . దాంతో కిల్లర్ ఆచూకీ గురించి చిక్కుముడులు ఒకటొకటిగా విడిపోతాయి . రొటీన్ క్లైమాక్స్ అయినా సినిమా మొదటినుంచి గ్రిప్పింగ్ తో నడవడంతో ఆసక్తి కలిగిస్తుంది .

ఎవరెలా చేసారు ?

తెలుగు ప్రేక్షకులకు పరిచయం అయిన నటులెవరూ ఇందులో లేరు . అయినా అన్వర్ పాత్రలో నటించిన కుంచకో బోబన్ సాలిడ్ నటన ప్రదర్శించాడు . సైక్రియాట్రిస్టు గా అతడు సెటిల్డ్ గా నటించాడు . నిజానికి సినిమాలో ఇతడి పాత్రకే ఎక్కువ స్కోప్ ఇచ్చారు . మిగిలినవాళ్లు తమ పాత్ర పరిధి మేరకు నటించారు .

సాంకేతికత

సుశాన్ శ్యాం అందించిన మ్యూజిక్ బాగుంది . ముఖ్యంగా క్లైమాక్స్ సన్నివేశంలో అతడు అందించిన బీజీఎమ్ బాగుంది .

ఇక ఖలీద్ అందించిన సినిమాటోగ్రఫీ కూడా బాగుంది .. కిల్లర్ డెన్ లో లైటింగ్ ఎఫెక్ట్స్ బాగా చూపించారు .. అంతేకాకుండా సహజ అందాలకు పుట్టిల్లయిన కేరళ అందాలను కొన్నిచోట్ల చక్కగా చూపించాడు .

నిర్మాణ విలువలు బాగానే ఉన్నాయి .. బిగి సడలని గ్రిప్పింగ్ తో దర్శకుడు సినిమాని నడిపిన విధానం బాగుంది .

విశ్లేషణ

సస్పెన్స్ క్రైమ్ థ్రిల్లర్ జానర్ మూవీలను ఇష్టపడేవారికి ఈ సినిమా నచ్చుతుంది . రొటీన్ ఫార్మాట్ లో పోలీసులు , కిల్లర్ కోణంలో కాకుండా సైక్రియాట్రిక్ కోణంలో కథను నడపడంతో కొంత కొత్తదనం వచ్చింది . సీరియల్ మర్దర్లు జరగడం , పోలీసులు ఇన్వెస్టిగేషన్ చేసి కిల్లర్ ను పట్టుకోవడం గతంలో చాలా సినిమాల్లో చూసేసాం . అందుకే మూస కధనం జోలికి పోకుండా ఈ సినిమాని సైకో కోణంలో దర్శకుడు నడిపించిన విధానం బాగుంది .

కాకపోతే ఒక ప్రైవేట్ సైక్రియాట్రిస్టు మీద మొత్తం పోలీస్ డిపార్ట్మెంట్ ఆధారపడటం కొంచం ఎబ్బెట్టుగా ఉంటుంది . కనీసం అతడు డిపార్ట్మెంట్ సైక్రియాట్రిస్టు అయినా ఒక లెక్క ఉండేది . డిపార్టుమెంటుకు సంబంధం లేని వ్యక్తి పూర్తి స్థాయిలో నిద్రాహారాలు మానుకుని ఇన్వెస్టిగేషన్ చేయడం , డిసిపి స్థాయి ఆఫీసర్ కూడా అతడి సలహాలను ఫాలో అవడం లాజిక్ కి అందదు . అయితే ఆ లాజిక్ ను పక్కనబెడితే సినిమా ఒకరకమైన ఫ్లోలో సీరియస్ గా సాగిపోతుంది . ఎక్కడా అనవసరమైన కామెడీ ఉండదు . సైబర్ నిపుణుడి ద్వారా కొంత కామెడీ చేయిద్దామని ప్రయత్నించారు కానీ పర్లేదు .

ఇక క్లైమాక్స్ లో ఒక సన్నివేశం బాగుంటుంది . జైల్లో ఉన్న కిల్లర్ దగ్గరికి అన్వర్ వచ్చి ‘ నువ్వు ఏ పరిస్థితుల్లో ఈ మర్దర్లు చేసావో నాకు తెలుసు .. కనీసం ఇప్పటికైనా నీ నేరం ఒప్పుకుని కన్ఫెషన్ స్టేట్మెంట్ ఇస్తే కనీసం శిక్ష తగ్గే అవకాశం ఉంటుంది . అది కాకుండా నువ్వు చంపాలనుకున్న ఏసిపి అనిల్ ఇంకా బతికే ఉన్నాడు .. పాపం నీ టార్గెట్ మిస్ అయ్యింది .. అని జాలి పడతాడు .
అప్పుడు కిల్లర్ ‘ న్యాయదేవత ఇంకా బతికే ఉంది ‘ అని సమాధానం చెప్తాడు . అతడి మాటకు అర్ధమేంటో క్లైమాక్సులో తెలుస్తుంది .
ఓవరాల్ గా సినిమా టైటిల్ కు న్యాయం చేసింది . ప్రస్తుతం ఆహా ఓటిటి లో తెలుగులో అందుబాటులో ఉంది కాబట్టి లాంగ్వేజ్ ప్రాబ్లమ్ కూడా లేకుండా చూడొచ్చు .

నటీనటులు : కుంచకో బోబన్ , శ్రీనాథ్ బసి తదితరులు
సంగీతం : సుశీన్ శ్యాం
సినిమాటోగ్రఫీ : ఖాలిద్
రచన ,దర్శకత్వం : మిధున్ థామస్
విడుదల : ఆహా ఓటిటి ( తెలుగు )
రేటింగ్ : 2.75 / 5